Жол саласындағы кадр даярлау мәселесі де назардан тыс қалмай келеді. Бұл бағыттағы жұмыс жыл сайын дәстүрлі түрде жалғасып отыр. Жалпы «Жол активтері ұлттық сапа орталығы» РМК Павлодар облыстық филиалында болашақ жол мамандары – 28 студент өндірістік тәжірибеден өтті, деп хабарлайды Todayinfo ақпараттық агенттігі.
Практикадан өткен жастардың қатарында Павлодардағы жоғары оқу орындары мен құрылыс колледжінің студенттері бар. Сонымен бірге, орталық пен Жоғары коммуникация және электроника колледжі арасында жасалған меморандум аясында аталған оқу орнының студенттері де алғаш рет тәжірибеден өтуге мүмкіндік алды.
Болашақ инженерлер мен зертхана мамандары жол құрылысында қолданылатын материалдармен тікелей жұмыс істеді. Олар керн үлгілерін талдап, қиыршық тас пен топырақ сапасын анықтауды, битумға сынама жасауды үйренді. Зертхана меңгерушісі Виктория Бойконың айтуынша, студенттер нақты өндірістік тапсырмаларды орындап, кәсіби тәжірибе жинады.
Жыл басынан бері филиал зертханасына республикалық және жергілікті жолдарға 300 рет шығып, 70 тен аса нысандарға барып, мыңдаған сынама жеткізілген, оның ішінде 500 ден астам үлгі зертханалық сараптамадан өтті.
Инновациялық Евразия университеті ұстаздарының айтуынша, мұндай тәжірибе жастар үшін теориялық білімді нақты өндірістік жағдаймен ұштастыруға үлкен мүмкіндік береді. Сонымен қатар, бұл болашақ мамандардың сала маңызын терең түсінуіне жол ашады.
– Біз бұл орталықпен ұзақ жылдан бері тығыз әріптестік орнатқанбыз. Студенттер практика барысында жол құрылысы мен сапа бақылауындағы заманауи әдістермен танысады. Әсіресе битум түрлері мен олардың қолданылу ерекшеліктері туралы кең көлемде мағлұмат алады. Мекеме мамандарының кәсіби біліктілігі мен студенттерге деген жылы қарым-қатынасы оң әсер қалдырады, – дейді олар.
Биыл тәжірибеден алғаш рет өткендердің бірі – Жоғары электроника және коммуникация колледжінің 3-курс студенті Никита Фот. Ол зертханадағы практика барысында маңызды білім мен дағдыға ие болғанын атап өтті:
– Менің мамандығым – жол құрылысына тікелей байланысты. Практика кезінде битумды тазалау, жандыру, қиыршықтасты електен өткізу сынды зертханалық жұмыстарды меңгердім, – деді ол.
