Бұл туралы Todayinfo.kz ақпарат егенттігі хабарлайды.
Премьер-министр Олжас Бектеновтің төрағалығымен өткен Экономикалық саясат жөніндегі кеңесте инфляцияны бақылау, әлеуметтік-экономикалық даму болжамы және бағаны тұрақтандыру мәселелері талқыланды. Бұл туралы Үкіметтің баспасөз қызметі мәлімдеді.
Ұлттық банктің дерегінше, 2024 жылғы маусымда инфляция жылдық мәнде 11,8%-ды құрады. Бұл көрсеткіш әлемдік нарықтағы тұрақсыздық, тарифтік өзгерістер және тұтынушылық сұраныстың артуы секілді ішкі-сыртқы факторлардың әсерінен қалыптасқан.
Инфляцияны төмендету мақсатында Үкімет Ұлттық банкпен және әкімдіктермен бірлесіп, жүйелі шаралар қабылдап жатыр. Қысқа және ұзақмерзімді кезеңді қамтитын жаңа бағдарлама дайындалған. Құжат Үкімет қаулысымен бекітілмек.
Негізгі шаралар:
-
Ішкі өндірісті ұлғайту;
-
Тарифтік саясатты тұрақтандыру;
-
Базалық тауарлар бағасын бақылау;
-
Инфляциялық күтулерді азайту.
Ұлттық экономика министрлігінің мәліметіне сәйкес, 2024 жылдың басынан бері шекті сауда үстемесін (15%) асыру бойынша 1 847 әкімшілік іс қозғалған. Бұған дейін ескерту түрінде берілсе, енді тікелей айыппұл салынады. Коммуналдық қызмет тарифтерінің негізсіз өсуіне жол бермеу де басты назарда. Бұл бағытта инфляцияға 0,5 пайыздық тармақша деңгейінде ықпал етілген.
2023 жылы қабылданған шаралар инфляциялық қысымды 4,16 пайыздық тармақшаға төмендетсе, 2024 жылы бұл көрсеткіш 2,3 пайыздық тармақшаға азайды. Қазір бұл кешен 2026 жылға дейін ұзартылып отыр.
Баға тұрақтылығы және ауыл шаруашылығы:
Сауда және интеграция министрлігінің дерегінше, Қазақстанда әлеуметтік маңызы бар азық-түлік тауарларының (ӘМАТ) бағасы ЕАЭО және Орталық Азия елдеріне қарағанда айтарлықтай төмен:
-
Сиыр еті – 30% арзан;
-
Картоп, сәбіз – 38%;
-
Пияз – 47%;
-
Қырыққабат – 50%.
Жыл басынан бері нарықтық бағадан төмен 3 мыңнан астам ауыл шаруашылығы жәрмеңкесі өтті. Сауда бағасын тежеу үшін 30 мыңнан астам жеткізу келісімшарты жасалып, Қытай, Пәкістан, Өзбекстаннан маусымнан тыс көкөніс жеткізілді.
Ауыл шаруашылығы министрі Айдарбек Сапаровтың мәліметінше, 2025 жылдың қаңтар–мамыр айларында ауыл шаруашылығы өнімінің көлемі 4%-ға артып, 1,3 трлн теңгеге жетті. Азық-түлік өндірісі 10,5%-ға өскен.
Сондай-ақ, күнбағыс майы өндірісі 2024 жылы 15%-ға артып, ішкі сұраныстан 2 есе көп болды. Алты айда 388 мың тонна май өндіріліп, бұл өткен жылмен салыстырғанда 21,3%-ға артық. Экспорт көлемі де 294 мың тоннаға жетіп, 41%-ға өсті. Қазіргі уақытта елде 5 ірі қайта өңдеу зауыты салынып жатыр.
Олжас Бектенов: Инфляциямен күрес – Үкімет пен Ұлттық банктің ортақ міндеті
Кеңес соңында Премьер-министр инфляцияға қарсы күресте жүйелі және келісілген әрекет қажет екенін атап өтті.
– Инфляцияны төмендету – Үкімет пен Ұлттық банктің бірлескен, кезең-кезеңімен жүзеге асатын негізгі міндеті. Бұл бағыттағы шаралар нақты нәтижеге бағытталуы керек, – деді Олжас Бектенов.
