ҚР Оқу-ағарту министрлігі «Баганашыл» балалар үйіне қатысты ресми мәлімдеме таратты. Ведомствоның хабарлауынша, министр Ғани Бейсембаев жағдайды бақылау үшін оқиға орнына барған. Ол Алматы қаласының әкімі Дархан Сатыбалдымен бірлесіп, тәрбиеленушілерге қауіпсіз жағдай жасау және оқу үдерісін ұйымдастыру бойынша жұмыстар жүргізуде, деп хабарлайды Todayinfo.
— Қазіргі ахуалға байланысты балаларға қажетті психологиялық көмек көрсетіледі. Заңмен кепілдендірілген жетім балалардың барлық құқығы қатаң сақталады, — деді министрлік өкілі Мереке Амангелдіқызы.
Сондай-ақ, Мемлекет басшысының тапсырмасымен балаларды көшіру туралы шешімнің күшін жою туралы хабарланды. Бұл мәселе бойынша Президент Әкімшілігінің бастамасымен қызметтік тергеу тағайындалды.
Бұған дейін Алматы қаласындағы «Баганашыл» шағынауданында орналасқан №1 облыстық балалар үйінің Конаев қаласына көшірілетіні туралы ақпарат тараған болатын. Алайда тәрбиеленушілер көшуге қарсы бейнеүндеу жолдап, бұрынғы ғимаратта қалуды сұраған. Себеп — ғимараттың апатты жағдайда екені айтылған еді.
Кейін Алматы облысы әкімдігі қазіргі тәрбиеленушілер Алматыда қалып, оқуын жалғастыратынын, ал болашақта келетін жаңа балалар Конаевтағы жаңа ғимаратқа орналастырылатынын хабарлаған.
Аталған мәселе бойынша бұған дейін Алматының бұрынғы әкімі Ерболат Досаев та пікір білдірген.
