Астана сотында “BizBirgemiz Qazaqstan 2030” қоғамдық қоры арқылы миллиардтаған қаржыны жымқырды деп айыпталған Перизат Қайрат пен анасы Ғайни Алашбаеваға қатысты қылмыстық іс бойынша прокуратура үкім мерзімін жариялады,деп хабарлайды Todayinfo ақпарат порталы.
Мемлекеттік айыптаушы Перизат Қайраттың әрекеттерінен жеңілдететін бірде-бір жағдай анықталмағанын атап өтті. Оның айтуынша, айыпталушы халықтың сенімін пайдаланған, шынайы қайырымдылыққа көлеңке түсірген.
«Қайырымдылықты бүркемелеп, жеке байлыққа жетуді мақсат еткен адам үшін бұл әрекет ақтауға келмейді. Мұндай істер қоғамдық тәртіпке, мораль мен сенімге ауыр соққы болып табылады», – деді прокурор.
- Перизат Қайрат үшін – 10 жыл бас бостандығынан айыру,
- Ғайни Алашбаева үшін – 8 жыл бас бостандығынан айыру жазасы сұралды.
Айта кетейік, бұған дейін жарыссөз кезеңінде прокурор айыпталушылардың 2021–2024 жылдар аралығында 3,5 млрд теңгені жымқырғанын мәлімдеген болатын. Қаражат оңалту орталықтарына, су тасқынынан зардап шеккендер мен шетелдегі гуманитарлық көмек деп көрсетілгенімен, элиталық мүлік пен жеке қажеттіліктерге жұмсалғаны анықталған.
