Құрлықтық хоккей лигасының (ҚХЛ) жаңа маусымы қарсаңында «Барыс» хоккей клубы бас бапкердің қызметіне қатысты ресми мәлімдеме жасады, деп хабарлайды клубтың баспасөз қызметі,деп хабарлайды Todayinfo ақпарат порталы.
Бас бапкердің міндетін уақытша Евгений Королев атқарады
Өткен маусымдағы төмен спорттық көрсеткіштерге байланысты негізгі команданың жаттықтырушылар құрамында өзгерістер енгізу туралы шешім қабылданған. Қазіргі уақытта «Барыс» командасының бас бапкерінің міндетін уақытша Евгений Королев атқарып отыр.
«Барлық регламенттік рәсімдер аяқталғаннан кейін өзгерістерге қатысты толық ақпарат ұсынылатын болады», – делінген клубтың хабарламасында.
Ғалым Мәмбеталиевпен өтемақы мәселесі қаралуда
Алайда ресми мәлімдемеге қарамастан, қазіргі бас бапкер Ғалым Мәмбеталиев қызметінен әлі ресми түрде босатылған жоқ. Клуб тарапынан оның келісімшартына байланысты өтемақы туралы келіссөздер жүріп жатуы мүмкін.
Ресейлік Sport24.ru басылымының хабарлауынша, Ғалым Мәмбеталиевтің үшжылдық келісімшарты бар және оны мерзімінен бұрын тоқтату 194 миллион теңгеге дейін шығын келтіруі ықтимал.
