Белгілі экономист Мақсат Халық құжатындағы аты-жөнін қазақшалау процесінің қалай өткенін айтып, жазба жариялады, деп хабарлайды Todayinfo.
«Құрметті достар, бір жақсы тәжірибеммен бөліссем деймін. Жақында куәліктегі аты-жөнімді толық қазақшалап алдым. -ов пен -евті алып тастау көптен ойымда жүрген дүние еді. Бірақ менің жағдайымда бұл үрдіс біршама күрделі болды. Себебі… Әкемнің құжаттарында бұрынғы орыстандыру саясатының салдарынан «Халық» деген атамның аты бұрмаланып, «Калик» деп жазылып кеткен. Соның кесірінен менің де барлық құжаттарымда «Каликов» болып кеткенмін. Алғашында Халыққа қызмет көрсету орталығына барғанда: – ов пен евті оңай алып тастауға болады, – Әріптерді де қазақшалауға болады, бірақ Х әрпін енгізе алмаймыз, К әрпін Қ-ға ауыстырамыз, сонда сіздің тегіңіз Қалық болады, – деп түсіндірді. Бұл нұсқа мені қанағаттандырмады. Себебі атамның шын аты – Халық, ал «Қалық» деген мүлде басқа ұғым», — дед ол.
Экономист бірнеше ЦОН қызметкерімен сөйлесіп, мәселесін шеше алмаған. Содан кейін ғалымдарға жүгініп, ғылыми құжатпен дәлелдеуге тура келген.
«Соңында Тіл білімі институтына барып, ғалымдардан ресми негіздеме жаздырып алдым:
“Қазақ тілінде «Калик» есімі жоқ, бұл – «Халық» деген сөздің бұрмаланған нұсқасы”, — деген анықтама берілді. Осы анықтаманың негізінде:1. Алдымен туу туралы куәлігімді өзгерттім.
2. Кейін жеке куәлік, паспорт, неке куәлігі, қызымның туу туралы куәлігі – барлық құжаттарды кезең-кезеңімен жаңарттым.
Паспортымда АҚШ-тың 10 жылдық визасы бар еді. Оны не істеймін деп алаңдадым. Бірақ ол да шешіледі екен: Жәй ғана өтініш жазасыз – визасы бар ескі паспортыңызды мерзімі аяқталғанша өзіңізбен бірге ұстап жүре бересіз. Егер аты-жөніңізді қазақша жазып, нағыз ұлттық болмысыңызға сай болғыңыз келсе – еш қорықпаңыз», — деді ол.
Мақсат Халық есімін қазақшалауға ниетті азаматтарға табандылық танытуға кеңіес берді.
«Бұл – бір күндік шаруа емес. Бірақ әрқайсымыз осылай әрекет етсек, елімізде ұлттық сана мен тілге деген құрмет артады. Өз елімізде қазақша аты-жөнімізбен жүрейік!», — деп жазды ол.
