Астана қаласында қайырымдылық мақсатында жиналған ірі көлемдегі қаржыны заңсыз иемдену ісі бойынша Перизат Қайрат пен оның анасы Ғайни Алашбаеваға қатысты сот процесі жалғасып жатыр. Бүгінгі сот отырысында жарыссөз кезеңі өтіп, жәбірленуші тараптар мен олардың өкілдері өз пікірлерін білдірді,деп хабарлайды Todayinfo.
Сотта «Kaspi Bank» АҚ-ның өкілі Айдар Ксенбаев сөз сөйлеп, сот пен қатысушылардың назарын іс бойынша жиналған дәлелдерге аударды. Оның айтуынша, тергеу мен сот процесі барысында айыпталушылардың кінәсі толық дәлелденген.
«Қазіргі уақытта Қайрат Перизат пен Ғайни Алашбаеваға қатысты қылмыстық іс қаралып жатыр. Тергеу мен сот процесі барысында істің барлық мән-жайы анықталды. Айыпталушылардың кінәсі толық дәлелденді. Бұл – қылмыстық іс материалдары, жәбірленушілер мен куәгерлердің айғақтары және сараптама қорытындылары арқылы расталған», – деді Ксенбаев.
Kaspi Bank өкілі 2024 жылғы су тасқыны кезінде зардап шеккендерге көмек көрсету мақсатында айыпталушылар құрған қоғамдық бірлестіктің есепшотына 620 миллион теңге көлемінде қайырымдылық қаржы аударылғанын атап өтті.
«Kaspi Bank» АҚ Қазақстан Республикасы халқын су тасқынына байланысты қолдау мақсатында аталған қоғамдық бірлестік шотына 620 миллион теңгені өтеусіз аударған болатын», – деді ол.
Kaspi Bank өкілі мемлекеттік айыптауды қолдай отырып, азаматтық талап арыз жолдады. Онда айыпталушыларды кінәлі деп тануды, прокурордың жазалау шарасына қатысты ұсынысын қолдауды және келтірілген материалдық залалды өтеуді сұрады.
«Қайрат Перизат пен Ғайни Алашбаеваны кінәлі деп тануды сұраймын. Оларға қатысты жазалау шарасы бойынша прокурордың ұсынысын қолдаймыз. Сонымен қатар Kaspi Bank пайдасына келтірілген 620 миллион теңге көлеміндегі материалдық шығынды өндіріп беруді сұраймын», – деді Ксенбаев.
