Белгілі құқық қорғаушы, заңгер Айгүл Орынбек Facebook парақшасында айтыскер ақын әрі коуч Айнұр Тұрсынбаеваның «Айдын Нұры» қорын мұқият тексеруді талап етті. Оның айтуынша, бұл қордың қызметі Қаңтар оқиғасы кезінде және одан кейін күмән туғызған,деп хабарлайды Todayinfo ақпараттық агенттігі.
«Айдын Нұрын қоры дәл Перизаттың қоры сияқты мұқият тексерілуі керек деп талап етемін! Қанды Қаңтар оқиғасының алдында халықтан аямай ақша жиналды. Кейін менің тексерсін деген сұранысымнан соң қор жабыла салды. Бұл — үлкен күдік тудырады», — деп жазды заңгер.
Айгүл Орынбектің айтуынша, елде бақылаусыз қорлар көбейіп, кейбір шенеуніктер мен әкімдер кәсіпкерлерден заңды түрде ақша жинау үшін қор құруды әдетке айналдырған.
«Яғни, параны айналып өтіп, қор арқылы алады. Қайырымдылықты желеу еткен жалған қорларды жабатын уақыт келді», — деді ол.
Заңгер мемлекет тарапынан мұндай әрекеттерге қатаң бақылау орнатуды, халықтың сенімін пайдаланып, ақша жымқыруға жол беріп отырғандарға шара қолдануды талап етті.
