Биыл Абай облысында дүбірлі той, Ұлы Абайдың 180 жылдығын мерекелеу 1 тамыздан басталады. Абай Құнанбайұлының 180 жылдық мерейтойына орай Абай облысында ұлттық рухты ұлықтап, салауатты өмір салтын насихаттауға бағытталған бірқатар спорттық іс-шаралар ұйымдастырылады, деп хабарлайды Todayinfo.
«Абай елі» мерекелік алаңы – басты сахна мен этноауыл кеңістігі
Қарауылтөбеде орналасқан мерекелік алаң мерейтой аясындағы ауқымды іс-шаралардың негізгі бөлігі өтетін орынға айналмақ. Бұл жерде:
- 400 орындық көрермен алаңы бар үлкен дала сахнасы орнатылады;
- ат жарысына арналған арнайы шеңбер дайындалады;
- киіз үйлер қалашығы бой көтереді;
- 2500 шаршы метрді құрайтын кәсіпкерлерге арналған сауда аймағы іске қосылады;
- жарық, су, кәріз жүйелері мен санитарлық-тұрмыстық нысандар толық қамтылады.
Қосымша жолдар салынып, жаяу жүргіншілерге арналған өткелдер абаттандырылады. Мұнда «Жеті қазына» республикалық фестивалінің ашылуы, «Сұлу әйел» және «Ер жігіт» байқаулары өтеді.
«Абай елі» стелласы – рухани символ
Қарауылтөбе аумағында орнатылатын «Абай елі» стелласы мерейтойдың көрнекті символдарының бірі болмақ. Композицияда бесік пен домбыра сынды ұлттық құндылықтар бейнеленіп, «Абай елі» деген жазуы арқылы өңірдің рухани-мәдени маңызын көрсетеді. Стелланы орнатуға жергілікті кәсіпкерлер демеушілік жасайды.
Абай саябағы – абаттандыру және фестиваль аймағы
Семей қаласындағы Абай саябағында мерейтой қарсаңында абаттандыру және көгалдандыру жұмыстары жүргізіледі. Бұл жерде «Жеті қазына» фестивалінің салтанатты ашылуы және халықтық-мәдени іс-шаралар өтеді.
«Этно ауыл Жидебай» – туристік кешен
«Туған жерге туыңды тік» акциясы аясында Жидебайда жаңа «Этно ауыл Жидебай» туристік кешенінің құрылысы басталады. 60 гектар аумақты қамтитын бұл нысан:
- киіз үйлер мен бунгало үлгісіндегі жыл бойы жұмыс істейтін қонақүйлер;
- этно-SPA орталығы;
- қоғамдық тамақтану орындары;
- ипподром мен хайуанаттар бағы;
- конференц-зал, тимбилдинг аймақтары;
- электромобильдерге арналған қуаттау станциялары;
- қымыз құю желісімен жабдықталады.
Жоба іске қосылғаннан кейін 50 адам тұрақты жұмыспен қамтылатын болады. Бұл өңір туризмін дамытуға серпін береді.
Қарауыл ауылындағы қонақ үй кешені
Меценат Бектас Шыңғысұлының қолдауымен Қарауыл ауылында 1200 шаршы метрлік заманауи қонақ үй кешенінің құрылысы басталады. Нысанда:
- мейрамхана мен кофейня,
- жазғы терраса,
- балалар ойын алаңы,
- бильярд залы қарастырылады.
Бұл жоба арқылы қосымша 15 адам тұрақты жұмыспен қамтылатын болады.
«Абай–Шәкәрім» мемориалдық кешені – қалпына келтіру жұмыстары
«Абай–Шәкәрім» мемориалдық кешенінде:
- кесенелерді ағарту,
- жарықтандыру,
- сырлау-бояу,
- сыртқы бағаналарды жөндеу жұмыстарын
«Қазреставрация» мекемесі жүзеге асырады.
Облыс әкімінің тапсырмасы бойынша барлық жұмыстар сапалы әрі мерзімінде аяқталуға тиіс.
Жидебай – цифрлық қолжетімділікпен қамтылған тарихи мекен
Абай музей-қорығында Beeline ұялы байланыс операторының интернет желісі іске қосылады. Бұл желі Жидебаймен қатар, көрші елді мекендерге де қолжетімді болады. Сонымен қатар, 1 тамызда Бөрілі елді мекенінде де антенна-діңгекті құрылғы орнатылады. Нәтижесінде Абай ауданы Шығыс Қазақстандағы толық интернетпен қамтылған алғашқы аудан атанбақ.
Абай облысы олимпиадалық спорт түрлері бойынша жоғары спорт шеберлігі мектебінің директоры Мұхит Тұрсыновтың айтуынша, 4 тамыз күні Семей қаласында күштік экстрим бойынша «Семей батыры» атты ашық турнир өткізу жоспарланған.
Сонымен қатар, 3–6 тамыз аралығында қазақ күресінен Қазақстан Республикасы Кубогының жеңімпаздары анықталады. Ал 7 тамыз күні Абай жолына тағзым ретінде Семей мен Қарауыл бағыты бойынша 180 шақырымдық ультрамарафон ұйымдастырылып, ұлттық мұра мен тарихи жадыға құрмет көрсетілетін болады.
Мерейтой аясындағы маңызды спорттық іс-шаралардың бірі – 7–10 тамыз күндері Абай ауданының Қарауыл ауылында өтетін «Жеті қазына» жобасы болмақ. Бұл туралы бұған дейін өткен баспасөз мәслихатында Абай ауданының әкімі Мейіржан Смағұлов та атап өткен болатын.
«Ауқымды бағдарламада дәстүрлі садақ ату, құсбегілік, тазы жарысы, тоғызқұмалақ, қазақ күресі және ат спорты ойындарының бірнеше түрлері қамтылған. Жарыстар жорға жарысы, топ бәйге, аламан бәйге секілді ат спортын, сондай-ақ қазақ күресінің «Өгіз палуан» (74 кг дейінгі салмақ) және «Түйе палуан» (90 кг-нан жоғары салмақ) санаттарын қамтиды», – деп атап өтті спикер.
Спикердің айтуынша, ұлттық спорт түрлерінде жеңіске жеткендерге аса қомақты жүлделер тағайындалған. Мәселен, аламан бәйгеде бірінші орынды жеңіп алған шабандозға нарықтық құны 22 миллион теңгеге дейін жететін заманауи автокөлік табысталады.
Тоғызқұмалақ ойынының үздігіне отандық өндірістен шыққан Lada Granta көлігі, ал қазақ күресінің «Түйе палуан» салмағында жеңіске жеткен балуанға Chevrolet Monza маркалы автокөлік сыйға беріледі. Дәстүрлі садақ ату мен құсбегілік жарыстарының жеңімпаздарына үш бас жылқыға дейін, сондай-ақ жекелеген сайыстарда 2 миллион теңгеге дейінгі ақшалай сыйақы мен 1–5 бас аралығындағы асыл тұқымды жылқылар беріледі.
«Бұл додаларға Абай облысының атынан еліміздің және халықаралық ареналарда жеңіске жеткен тәжірибелі спортшыларымыз қатысады. Олар – тоғызқұмалақтан әлем және Азия чемпионаттарының жүлдегері Исахан Аяна, құсбегіліктен Дүниежүзілік көшпенділер ойындарының күміс жүлдегері Ерзат Байқадамов, садақ атудан халықаралық сайыстардың жеңімпаздары Асқарбек Усабаев, Темірлан Түсіпханов және Елзат Маусымбек. Сонымен қатар қазақ күресінен Қазақстан және Азия біріншіліктерінің жеңімпаздары мен жүлдегерлері – Дидар Тұқышев, Есхат Тұрсынбек, Дәурен Нуралинов сынды балуандар бозкілемге шығады», – деді Мұхит Тұрсынов.
1 тамыз – «Артық ғылым кітапта» атаулы күні
- «Abai akademiasy» – Абай шығармашылығына арналған тұңғыш энциклопедиялық порталдың тұсаукесері өтеді.
- Семей қаласындағы зағип және нашар көретін азаматтарға арналған арнайы кітапхана ашылады.
- «Бейбітшілік» аралында ұлттық нақыштағы Этноауыл ашылады.
- Аңсаған Мұстафаның «Көңілге түрлі ой салар» атты сурет көрмесі ұйымдастырылады.
- «Асыл мұра» атты қолөнер шеберлерінің облыстық фестивалі өтеді.
- Абайға арналған ұлттық фильмдер көрсетілетін «Aspan Cinema» ашық аспан астындағы кино көрсетілімі басталады.
- «Адамзаттың алыбы – хакім Абай» атты өнер жұлдыздарының мерейтойлық концерті қойылады.
2 тамыз – «Көңіл құсы құйқылжыр шартарапқа» атаулы күні
- «АБАЙ QUIZ» республикалық зияткерлік ойыны өтеді.
- «Абай мұрасы – халық даналығы» атты әдеби кеш ұйымдастырылады.
3 тамыз – «Ұйықтап жатқан жүректі ән оятар…» атаулы күні
- Абай театры сахнасында «Абай әлемі» атты ұлттық рухани кеш өтеді.
4 тамыз – «Адамның кейбір кездері» атаулы күні
- Ертіс жағалауында күштік экстримнен «Семей батыры» ашық турнирі өтеді.
- Майра Ильясованың «Ән Майра, әнші Майра, ару Майра» атты арнайы жобасы ұсынылады.
- Секен Тұрысбеков пен «Ақ жауын» оркестрі «Абай жолы» концертімен өнер көрсетеді.
5 тамыз – «Әнді сүйсең, менше сүй» атаулы күні
- Шахимардан Әбіловтың «Ой толғау – Хәкім Абай» монооперасы ұсынылады.
- Қазақ күресінен республикалық чемпионат ұйымдастырылады.
- Халықаралық сән көрсетілімі өтеді.
6 тамыз – «Адамзаттың бәрін сүй, бауырым деп…» атаулы күні
- Абай алаңында «Абай елі – өнер кеніші» атты аудан өнерпаздарының концерті өтеді.
- Жас ақындардың «Өлең сөздің патшасы» халықаралық мүшәйрасы өтеді.
7 тамыз – «Құлақтан кіріп, бойды алар әсем ән мен тәтті күй» атаулы күні
- Асқар Алтайдың шығармашылық кеші және «Абай жолы» энциклопедиясының тұсаукесері өтеді.
- Бағашар Тұрсынбайұлының «Абай Құнанбайұлы кім?» кітабының тұсаукесері ұсынылады.
- «Семей – Қарауыл» жүгіру марафоны өтеді.
- «Жеті қазына» ұлттық байқауы ашылады.
- «Адамзаттың Абайы» республикалық ақындар айтысы өтеді.
8 тамыз – «Мақсұтым – тіл ұстартып, өнер шашпақ» атаулы күні
- Абай елінен шыққан өнерлі жұптардың «Жастықтың оты жалындап» атты гала-концерті өтеді.
- «Абай әлемі: аударма, тағылым, мұра» кітаптар топтамасы таныстырылады.
9 тамыз – «Ақыл, қайрат, жүректі бірдей ұста» атаулы күні
- Халықаралық ақындар фестивалінің ашылуы өтеді.
- «Жеті қазына» байқауының жабылу рәсімі өтеді.
- «Абай. Уақыт. Өнер» атты бейнелеу өнері көрмесі ұйымдастырылады.
- Өзге облыстардың шығармашылық ұжымдары «Абайға тарту» атты концерттік бағдарлама ұсынады.
- «Адамзаттың Абайы: руханият, парасат, таным» халықаралық конференциясы өтеді.
10 тамыз – «Абай күні» атаулы күні
- «Жидебай–Бөрілі» тарихи-мәдени музейінде Құран бағышталып, құрбандық шалынады.
- Қарауылтөбеде «Бала Абайдан дана Абайға» атты театрландырылған қойылым көрсетіледі.
- «Абай күні» мерекесінің салтанатты ашылу рәсімі өтеді.
- Ұлттық ат-спорт ойындары (топ бәйге, жорға, аламан бәйге) ұйымдастырылады.
- Қазақ күресінің финалдық бәсекелері өтеді.
- «Желсіз түнде жарық ай» және «Құлақтан кіріп, бойды алар…» атты гала-концерттермен мерейтойлық бағдарлама қорытындыланады.
Спорттық шаралар
- «Семей батыры» күштік экстрим турнирі
- Қазақ күресінен республикалық чемпионат
- «Семей – Қарауыл» марафоны
- Ат жарыстар: топ бәйге, жорға, аламан бәйге
- Қазақ күресінің финалдық сайыстары (түйе және өгіз балуандар)
