Ақмола облысының Жарқайың ауданында автомобиль жолдарын жөндеу және салу бойынша жобалар жүйелі түрде жүзеге асырылуда. Жұмыстар қала аумағын да, ауылдық елді мекендерді де қамтиды. Басты мақсат жол қозғалысы қауіпсіздігін арттыру, көлік қатынасының қолжетімділігін жақсарту және тұрғындардың өмір сапасын көтеру, деп хабарлайды Todayinfo ақпараттық агенттігі.
Державинск қаласында жалпы ұзындығы 3,2 шақырымды құрайтын төрт негізгі көшеде орташа жөндеу жұмыстары аяқталды. Комсомол көшесінде қосымша тротуар төселіп, Н.Крупская атындағы мектептің жанында автотұрақ салынды, жол кедергілері (жасанды бұдырлар) орнатылды. Бұл — жаяу жүргіншілер мен көлік жүргізушілерінің қауіпсіздігін қамтамасыз етуге бағытталған нақты шаралар.
Сонымен қатар, қала ішінде 8 мың шаршы метр аумақта ағымдағы жөндеу жұмыстары жүргізілуде. Мердігер – «Пейко» ЖК, келісімшарт сомасы — 63 миллион теңге. Жөндеу жұмыстары 2025 жылдың тамызына дейін аяқталады деп жоспарлануда.
«Жол сапасы — бұл жайлылық қана емес, бұл — тұрғындардың қауіпсіздігі. Қазір көріп отырған нәтиже — жүйелі жұмыстың бастауы ғана», — деді Державинск қаласының әкімі Смағұлов Заур Жамбылұлы.
«Жақсы — Державинск» облыстық маңыздағы автомобиль жолында 2024 жылы ұзындығы 12 шақырым болатын учаске жөнделді. 2025 жылға тағы 12 шақырым жол жөндеу жоспарланған. Бүгінгі күнге дейін 8 шақырымы асфальтталып, қалған бөлігінде жұмыстар жалғасуда.
«Жезқазған — Петропавл» республикалық маңыздағы автожолдың 445–490 шақырым аралығында ұзындығы 45 шақырым болатын орташа жөндеу жүргізілуде. Қазіргі таңда 15 шақырым жолға асфальт төселді. Жұмысты «Қазақ жолы — 2050» ЖШС жүзеге асыруда. Жобаның жалпы құны — 5,4 миллиард теңге. Аталған жол бөлігі Есіл ауданымен шекаралас аумаққа дейін жетеді.
Ауыл жолдары да назардан тыс қалмай отыр. «Ауыл – ел бесігі» мемлекеттік бағдарламасы аясында Отрадное және Кенское ауылдарында 3,1 шақырым жол жөнделіп жатыр. Жобаның құны — 210 миллион теңге, мердігер — «Пейко» ЖК. Жөндеу жұмыстары 2025 жылдың үшінші тоқсанында аяқталады деп жоспарланған.
«Автомобиль жолдарын жөндеу, бұл — тұрғындардың күнделікті өміріне әсер ететін маңызды қадам. Жолда жүру уақыты азаяды, қауіпсіздік артады, ауылдардың көркі жақсарады», — деп атап өтті Жарқайың ауданы әкімінің орынбасары Мұқашев Ербол Сәкенұлы.
Аудан көлемінде көлік инфрақұрылымын дамыту жұмыстары алдағы уақытта да жалғасады. Жаңартылған жолдар — қала мен ауылды, өткен мен келешекті байланыстыратын маңызды көпір, бұл өңірдің тұрақты дамуының негізі болмақ.
