Қазақстандық ірі құрылыс компаниясы BI Group өз қызметкерлерінің еңбегін жоғары бағалап, корпоративтік дәстүрге айналған мотивациялық шетел сапарларын тұрақты түрде ұйымдастырып келеді. Биыл рекордтық көрсеткішпен 200 қызметкер үш топпен Париж қаласына аттанып, Эйфель мұнарасы, Лувр, Версаль сынды көрнекті жерлерді аралады, әйгілі француз круассандарын татып көрді және романтикаға толы қаланың ерекше атмосферасына бөленді,деп хабарлайды Todayinfo ақпараттық агенттігі.
Сапарға қатысқандар қатарында Гүлбаршын Тасбулатова мен Жанна Игисинова сынды BI Servise компаниясының менеджерлері де болды. Олар көпқабатты үйлердің тазалығы мен тәртібін қадағалап, тұрғындармен тығыз байланыс орнатып, тұрмыстық мәселелердің шешілуіне көмектеседі. Екеуі де өз істерін шын жүректен сүйеді әрі жұмысқа үлкен жауапкершілікпен қарайды.
«Компанияға 16 жыл бұрын келгенде мұндай мүмкіндіктер болатынын елестетпеппін. Көптен күткен бұл сапар үшін алғысым шексіз. Әлемді танып, сүйікті іспен айналысу – үлкен бақыт», – дейді Жанна Игисинова.
Гүлбаршын Тасбулатова Қарағанды облысындағы ауылдан шыққан, үш баланың анасы. Әрбір тұрғынды атымен таниды, шынайы қамқорлық танытады. Ал Зайсаннан шыққан Жанна BI Group-та өзінің болашақ жарымен танысып, бүгінде төрт баланы тәрбиелеп отыр. Мұндай тағдыр тоғысқан отбасылар компания ішінде «BI-отбасы» деп аталады.
Бұл ерекше бастама BI Group компаниясында 10 жылдан астам уақыт еңбек етіп жүрген қызметкерлерді қамтиды. Соңғы 8 жылда 500-ден астам қызметкер осындай шетел сапарларына қатысып, әлемнің әртүрлі елдерін көрді. Сапарға жұмысшы, инженер, менеджер немесе топ-менеджер болу маңызды емес – барлық қызметкер тең дәрежеде қатыса алады. Сапар шығындары толықтай компания есебінен төленеді.
Компания корпоративтік мәдениетті дамытуға айрықша көңіл бөледі. Парижге сапармен қатар, 20 жылдан астам жұмыс істегендерге АҚШ-қа бару мүмкіндігі, ішкі даму бағдарламалары, ақшалай сыйақылар және ұжымдық рухты нығайтуға бағытталған ірі жобалар жүзеге асырылады.
