Астана қалалық қылмыстық істер жөніндегі сотының баспасөз қызметі «Biz Birgemiz Kazakhstan 2030» қоры аясында жүргізілген ірі алаяқтық ісіне қатысты сот процесінің шешімін шығарды. Қайырымдылық ұранымен қаражат жинаған Перизат Қайрат пен оның анасы Ғайни Алашбаеваға бірқатар ауыр айыптар тағылып отыр,деп хабарлайды Todayinfo ақпараттық агенттігі.
Судья Перизатты 10, анасын 8 жылға бас бостандығынан айырды.
Соңғы жарыссөз кезінде прокурор Перизат Қайратты 10 жылға, ал анасын 8 жылға соттауды сұрады. Айыптау тарапының мәліметінше, бұл алаяқтық елде төтенше жағдай кезінде жасалған, ал бұл факт қылмысты ауырлататын мән-жай болып табылады. Прокурордың айтуынша, жазаны жеңілдететін бірде-бір негіз анықталмаған.
2021–2024 жылдар аралығында «Biz Birgemiz Kazakhstan 2030» атауын пайдалана отырып, аталған тұлғалар шамамен 3,5 миллиард теңге жинаған. Бұл қаражат су тасқынынан зардап шеккендерге, ауыр дертке шалдыққан балаларға және Палестина халқына көмек ретінде бағытталуы тиіс болған.
Алайда тергеу деректеріне сүйенсек, жиналған қаражаттың едәуір бөлігі жеке мақсатта жұмсалған. Атап айтқанда:
-
элиталы автокөліктер,
-
қымбат жылжымайтын мүлік,
-
дизайнерлік киімдер мен аксессуарлар,
-
бес жұлдызды қонақүйлерде демалыс.
Прокурор заңсыз әрекеттерді заңды қайырымдылық қызметі ретінде көрсетуге мүмкіндік берген негізгі схеманы да атады:
-
«BizBirgemiz» сияқты танымал ұранмен ұйым тіркеу;
-
Қаражат жинау үшін мұқтаж жандарды тарту;
-
Халықтың назарын аударатын іс-шаралар мен аукциондар өткізу;
-
Әлеуметтік желі мен БАҚ арқылы сенімге ие қайырымдылық бейнесін қалыптастыру;
-
Қаражаттың аз бөлігін шын мұқтаждарға беру арқылы әрекеттерін заңдастыру.
Перизат Қайрат пен Ғайни Алашбаеваға келесі баптар бойынша айып тағылып отыр:
-
ҚР ҚК 190-бабы, 4-бөлім, 2-тармақ — аса ірі көлемдегі алаяқтық;
-
ҚР ҚК 218-бабы, 2-бөлім, 1-тармақ және 3-бөлім, 3-тармақ — қылмыстық жолмен алынған кірістерді заңдастыру.
Айыпталушылар өз кінәсін мойындамай отыр. Перизат Қайрат қаражат шын мәнінде қайырымдылыққа жұмсалғанын айтса, анасы қаржы операцияларына қатысы жоқ екенін мәлімдеді.
