Фото: Sputnik.kz
Алматы облысындағы Сорбұлақ көлі маңында жоғалып кеткен әскери тікұшақтың экипаж мүшелерін іздеу жұмыстары әлі де жалғасуда. Іздеу-құтқару шараларына бірнеше мекеме жұмылдырылған,деп хабарлайды Todayinfo.
Із-түзсіз кеткен экипаж мүшелерінің бірі – Павлодар облысының тумасы Бахтияр Ержігітов. Оның әскери салада еңбек етіп келе жатқанына 15 жылдан асты. Бұл туралы оның әпкесі Аймереке Бегімова мәлімдеді.
«11-сыныпты аяқтаған соң Ақтөбедегі әскери училищеге оқуға түсті. Қазір 32 жаста. Оқу бітірген соң өз мамандығы бойынша бортинженер болып қызмет етіп келеді», – деді әпкесі.
Бахтияр – отбасындағы жалғыз ұл. Жұбайымен бірге төрт жасар ұлы мен екі жасар қызын тәрбиелеп отыр. Қазіргі таңда туыстары оны күн-түн демей іздеп жатыр.
Жоғалған тікұшақ бортында болған өзге екі әскери қызметкер – Аман Амангелді мен Нұржігіт Үйсінбаев. Үшеуі де Қазақстанның оңтүстігінде орналасқан бір әскери бөлімде қызмет етеді.
Іздеу жұмыстарының нәтижелері туралы ресми мәлімет әзірге жарияланған жоқ.
