Медиа тұлға Баян Алагөзова әнші Жұбаныш Жексенұлына қатысты дауға пікір білдіріп, әріптесін қорғады, деп хабарлайды Todayinfo.
Ол Instagram желісіндегі парақшасында халықтың танымал адамдарға деген шектен шыққан әрекетін сынға алды.
«Мен барлық әртістің, танымал адамдардың атынан сөйлегім келеді. Біреу жай ғана мейрамханада, вокзалда, әуежайда немесе басқа жерде отырса, оны рұқсатсыз видеоға түсіріп алады. Бұл — жеке кеңістікті бұзу. Әртіс те сіз секілді адам. Демалады, ұйықтамайды, шаршайды. Қайғырып немесе ашуланып отыруы мүмкін. Осындай сәтте біреу үн-түнсіз камерасын қосса, бұл кез келген адамның шамына тиюі мүмкін. Әртіс әркез көңілді болуға, фотоға түсуге, сөйлесуге міндетті емес», — деді Алагөзова.
Продюсер Жұбаныш Жексенұлына қолдау білдіріп, мұндай жанжалдарда көбіне тек бір тараптың ғана айыпталатынын айтты.
«Біз Жұбаныштың қоғамдық орында қандай жағдайда болғанын білмейміз. Әлгі адам, бәлкім, камерасын рұқсатсыз қосып, «Кеттік, селфи жасайық» дей салған шығар. Адам жайдан-жай дәл солай ашуға мініп кетпейді деп ойлаймын. Сондықтан мұндай оқиғада екі тарап та жауап беруі керек деп есептеймін», – деді ол.
Баян Алагөзова желі қолданушыларының біреудің сәтсіздігіне қуанып, оны аяқасты ететін әрекетін құптамайтынын жеткізді.
«Адамның өмірінде бірнәрсе дұрыс болмай қалса, әсіресе ол танымал адам болса, жұрт неге екенін білмей, бірден сырттай шешім шығарып, жамандай бастайды. Олар сол адамды мүлде танымаса да, кінәлап, моральдық қысым көрсетуге дайын тұрады. Біреуді «таяқ жеуге ыңғайлы» етіп алады да, тоқтамай үстінен жүреді. Мен Жұбанышқа күш-қайрат тілеймін», — деп түйіндеді ол.
Еске салайық, бұған дейін Жұбаныш Жексенұлы ұсақ бұзақылық жасады деген айыппен 78 640 теңге көлемінде айыппұл төлеген.
