2026 жылы Қырғызстанда өтетін Дүниежүзілік көшпенділер ойындарында қазақтың көкпары болмайды. Бұл туралы баспасөз мәслихатында ойындардың ұйымдастыру комитеті мәлім етті,деп хабарлайды Todayinfo ақпараттық агенттігі.
Қырғыз Республикасының дене шынықтыру және спорт жөніндегі мемлекеттік агенттігінің төрағасы Айбек Абдымомуновтың айтуынша, биылғы жарыстың бағдарламасына тек көкбөрү енген. Сонымен қатар, жарыс форматы да түбегейлі өзгермек.
«Бұл жолы командалар елдер бойынша емес, клубтық жүйе арқылы жасақталады. Яғни, әр елден келген спортшылар аралас командаларда өнер көрсетеді. Мысалы, бір командада Манас Ниязовпен қатар Қазақстан, Өзбекстан және Венгриядан келген спортшылар ойнай алады. Осылайша көкбөріні саяси аясынан шығарып, халықаралық деңгейде дамытамыз», – деді Абдымомунов.
Қазақ пен қырғыз арасындағы көкпар мен көкбөрү ережелері төңірегіндегі келіспеушілік бұрыннан белгілі. 2014 жылғы I Көшпенділер ойындарына Қазақстан құрамасы қатысқан жоқ. 2016 жылы финалда Қазақстан Қырғызстанға 3:15 есебімен жеңілді. 2018 жылы Қазақстан қатысудан бас тартты. Себеп – ұйымдастырушылар қазақ көкпарының ережесін сақтамаған, атап айтқанда, тайқазан орнына шеңбер қолданылған.
Қазақстандағы көкпар федерациясының президенті Ерлен Оспанов сол кезде қазақстандық БАҚ-қа берген сұхбатында бұл келіспеушіліктерді ашық айтқан болатын. Бұл мәлімдеме ел ішінде кеңінен талқыланып, қоғам наразылығын тудырған.
2022 жылы Түркияда өткен Көшпенділер ойындары кезінде де көкбөрү бағдарламадан шығарылудың аз-ақ алдында тұрған. Қазақстандық тараптың бастамасымен көкпарды енгізу ұсынылып, ақырында екі ұлттық ойын қатар өткізілген болатын. 2024 жылы Қазақстанда өткен V Көшпенділер ойындарында да көкпар мен көкбөрү қатар ұйымдастырылды.
Алайда 2026 жылы Қырғызстанда өтетін жарыста бұл дәстүр жалғаспайтын болды. Қазақтың көкпары ресми түрде жарыс бағдарламасынан алынып тасталды.
Журналист Нұргелді Әбдіғани бұған қатысты пікірін айтты.
«Көшпенділер ойындары» – ұлттық спорт түрлерінен өтетін әлемдегі ең ірі дода. Оны «Көшпенділер олимпиадасы» деуге болады», — дедік былтыр әйдіктеп. «Спорт – өзара құрмет пен сыйластық символы», — дедік тағы сол жолы. Алайда, Қырғыз жұрты қазақтың ұлттық спортын өзекке теуіп, өзімбілемдікпен бағдарламадан алып тастап жатса, қай бетімізбен «құрмет», «сыйластық» дей аламыз? Қырғыздардың былтыр Қазақстанның Әнұранына құрметсіздік жасап кеткенін де ұмытқан жоқпыз», — деді ол.
