Әлемге әйгілі қазақстандық әнші Димаш Құдайбергеннің «Love’s Not Over Yet» атты әні Radio Disney радиосының Мексикадағы барлық станцияларында ресми түрде эфирге шыға бастады. Бұл – Димаштың халықаралық деңгейдегі тағы бір маңызды жетістігі,деп хабарлайды Todayinfo ақпараттық агенттігі.
Бұл ауқымды бастамаға 2023 жылы Будапештте өткен Димаштың концертіне қатысқан жанкүйердің арманы түрткі болды. Ол сол кезде Димаштың дауысын Radio Disney толқынынан естуді армандаған.
Арман көп ұзамай шынайы жанкүйерлік қолдауға ұласып, 30-дан астам елдегі Dears фан-қоғамдастығы атсалысқан халықаралық кампания іске қосылды.
2024 жылдың қыркүйек айында X платформасында (бұрынғы Twitter) басталған #DimashRadioDisney хэштегі қысқа уақыт ішінде әлемдік трендке енді. Бұл оқиға Мексикадағы Radio Disney радиосының жүргізушілері мен продюсерлерінің назарын аудартты.
Пачука қаласындағы Radio Disney радиосының жүргізушісі Бриссия мен продюсер Эдуардо тыңдармандардың өтінішін қолдап, Димаш Құдайбергеннің «Love’s Not Over Yet» әнін ресми ротацияға енгізу туралы шешім қабылдады.
Қазір бұл ән Мексиканың барлық Radio Disney станцияларында тұрақты эфирде шырқалып жатыр.
Radio Disney Мексика ресми мәлімдемесінде:
«Біз Димаш Құдайбергеннің шығармашылығын сүйетін Dears Mexico фан-клубының бастамасын мақтан тұтамыз. “Love’s Not Over Yet” әні бүгінде Мексиканың барлық Disney радиоларында шырқалуда. Бұл бастама Аргентина, Уругвай, Перу секілді елдердегі жанкүйерлерге де шабыт береді деп сенеміз», – делінген.
