Түркістан облысында дәнді дақыл өсірумен айналысатын шаруаларды «Қазсушар» мекемесі шатастырып, енді оның зардабын фермерлер тартып отыр. Өңірде егістік алқабына су жетпей жатыр, деп хабарлайды Todayinfo агенттігі.
Облыстық әкімдіктің мәліметінше, шаруалар ескертуді елемей, алқап көлемін арттырып жіберген.
«Қазсушар» РМК ТФ мекемесі Жол картасында бекітілген индикаторды (күріш – 4 мың га) және облыс әкімдігінің хаттамалық тапсырмаларын ескермей, 13,1 мың гектар күріш дақылына ағын су жеткізуге 1032 шаруалармен тікелей (Мақтарал – 5200 га, Жетісай – 1500 га, Шардара – 6400 га) өзара келісімшарттар түзген.
Жалпы ағын су тапшылығы бойынша қалыптасқан жағдайға байланысты Түркістан облысы әкімі және облыс әкімінің орынбасары трансшекаралық келетін сулардың көлемін арттыру мақсатында Өзбекстан мемлекетіне бірнеше рет жұмыс сапарымен барып, келіссөздер жүргізді.
Бүгінгі таңда «Достық» МК-ы арқылы шаруаларға 85 м³/сек, қосымша машиналық әдіспен көтеру арқылы 15 м³/сек су босатылуда. «Қызылқұм» МК-ы арқылы шаруаларға 80,0 м³/сек беріліп отыр», — деп мәлімдеді облыс әкімдігінің баспасөз қызметі.
Ағын суды кезектілік тәртібімен бірінші кезекте мақта дақылына, су көлемі артылған жағдайда күріш дақылын суғаруға босату келісілген.
«Мемлекет басшысының “2024–2028 жылдарға арналған ауыл шаруашылығы жалпы өнімінің көлемін 2 есе ұлғайту” жөніндегі тапсырмасын орындау бойынша бекітілген Жол картасына сәйкес Түркістан облысы әкімдігі тарапынан аудан, қала әкімдеріне ылғал көп тұтынатын дақылдар алқабын қысқарту, ылғал үнемдеу технологияларына өту жөнінде тапсырмалар берілген. Облыс әкімдігінің хаттамалық тапсырмаларымен аудан, қала әкімдеріне және «Қазсушар» РМК ТФ мекемесіне нақты міндеттер белгіленген», — делінген хабарламада.
Алайда, «Қазсушар» мекемесі шаруалармен тікелей келісімшартқа отырып, қуаңшылық болатынын, күннің ыстық, судан таршылық туатынын ескермеген.
