Фото: freepik.com
«Қазақстан халқына» қоғамдық қоры 2025–2026 оқу жылында жоғары оқу орындарында білім алуға арналған «Білім беру гранттары» қайырымдылық бағдарламасы аясында 500 грант бөлетінін мәлімдеді,деп хабарлайды Todayinfo.
Бағдарлама әлеуметтік әділдікті арттыру және білімге тең қолжетімділік ұсыну мақсатында ұйымдастырылып отыр.
Грантты келесі санаттағы талапкерлер алуға үміткер бола алады:
- Ауылдық жерлерде, шағын және моноқалаларда тұратын, әлеуметтік аз қамтылған отбасылардан шыққан жастар;
- Жетім балалар немесе кәмелетке толғанға дейін ата-анасының қамқорлығынсыз қалғандар;
- Мүгедектігі бар азаматтар;
- Мүгедек балаларды тәрбиелеп отырған отбасылардан шыққан жастар;
- 2022 жылғы Қаңтар оқиғасы кезінде қаза тапқан азаматтардың балалары;
- Қаңтар оқиғасы кезінде жарақат алған балалар.
Бағдарламаға қатысу үшін үміткердің жасы 29-дан аспауы тиіс.
Грант атаулы және бір реттік тәртіппен ұсынылады. Алайда келесі тұлғалар бағдарламаға қатыса алмайды:
- Жоғары білімі бар азаматтар;
- Мемлекеттік немесе жергілікті бюджет есебінен «бакалавр» дәрежесін алған тұлғалар;
- Екінші жоғары білім алғысы келетіндер;
- Онлайн оқыту форматына қатысушылар.
Грант алуға үміткерлер ҰБТ-дан шекті балл жинаған талапкерлер қатарынан іріктеледі. Шығармашылық бағыттарға түсетіндер үшін – арнайы емтихан нәтижелері ескеріледі.
Үміткерлердің тізімі жоғары оқу орындарының конкурстық комиссиялары арқылы бекітіледі және хаттама түрінде рәсімделеді.
