Қазақстанда салынатын үшінші атом электр станциясын Қытай Халық Республикасы жүзеге асырады. Бұл туралы Премьер-министрдің бірінші орынбасары Роман Скляр Үкіметтегі баспасөз мәслихатында мәлім етті, деп хабарлайды Todayinfo ақпараттық агенттігі.
«Үшінші атом электр станциясын Қытай салады. Қазір осы станция орналасатын жерді анықтап жатырмыз. АЭС жанында міндетті түрде тұрақты сумен қамту көзі болуы қажет және электр энергиясын беретін аймақтар анықталуы керек. Осы жұмыстар жақын арада аяқталып, биыл станциялардың қайда салынатынын жариялаймыз деп ойлаймын», – деді Роман Скляр.
Бұл жаңалық жария болысымен, әлеуметтік желі қолданушылары мен кей сарапшылар арасында түрлі пікірлер айтылып, қоғамда қызу талқы тудырды. Желіде кей азаматтар Қытаймен атом энергетикасы саласындағы серіктестікті қауіпті деп бағаласа, енді бірі жобаның экономикалық маңыздылығын алға тартып отыр.
Естеріңізге салайық, бұған дейін еліміздегі алғашқы атом электр станциясын Ресейдің «Росатом» мемлекеттік корпорациясы салатыны хабарланған болатын. Ал екінші атом электр станциясының жобасын жүзеге асыру құқығы Қытайдың мемлекеттік CNNC (China National Nuclear Corporation) компаниясына берілген.
