Шетелге сапар жоспарлаған азаматтар міндетті түрде алдын ала медициналық дайындықтан өтуі тиіс. Бұл туралы Алматы қаласындағы №21 қалалық емхананың жалпы тәжірибе дәрігері Ақалтын Айтбаева айтты, деп хабарлайды Todayinfo ақпараттық агенттігі.
Оның айтуынша, кейбір мемлекеттерге кірерде арнайы екпе алғанын растайтын халықаралық сертификат талап етіледі.
«Саяхатқа шығу — жаңа елді танып білумен қатар, өз денсаулығыңыз үшін жауапкершілік алу дегенді білдіреді. Кей елдерде Қазақстанда сирек кездесетін жұқпалы аурулар таралған. Сондықтан қауіпсіз сапар үшін екпені алдын ала алып, иммунитет қалыптастыру маңызды», – дейді дәрігер.
Міндетті және ұсынылатын екпелер:
- Сары безгек – Африка мен Оңтүстік Америка елдеріне бару үшін міндетті.
Сертификат өмір бойы жарамды, екпе сапарға 10 күн қалғанда жасалады. - А және В гепатиті – Азия, Таяу Шығыс, Оңтүстік Америка және Африка бағытындағы сапарларға ұсынылады.
Инфекция су, тамақ, қан немесе биологиялық сұйықтық арқылы жұғады. - Іш сүзегі – Үндістан, Пәкістан, Бангладеш, Оңтүстік-Шығыс Азия елдеріне саяхаттаушыларға ұсынылады.
Ластанған су мен тамақ арқылы таралады. - Менингококк инфекциясы – Сауд Арабиясына қажылыққа баратындарға міндетті.
Менингит жиі кездесетін елдерге барғанда да ұсынылады. - Жапон энцефалиті – Оңтүстік-Шығыс Азияның ауылды аймақтарында ұзақ уақыт болатындарға ұсынылады.
- Құтырық – Ауылдық жерлерге сапар шегетіндерге, жануарлармен жұмыс істейтіндерге немесе еріктілерге ұсынылады.
- Кене энцефалиті – Ресей, Қытай, Шығыс Еуропа ормандарына бару кезінде өзекті.
- Қызылша, қызамық, паротит (MMR) – Бұрын егілмеген азаматтарға ұсынылады. Кейбір елдерде мезгілдік эпидемиялар тіркеледі.
Ұлттық күнтізбедегі екпелер – Сапар алдында сіреспе, дифтерия, көкжөтел, полиомиелит, тұмау, пневмококк сынды екпелердің толықтығын тексеру қажет.
Екпені қашан салдыру керек?
Кейбір вакциналар бірнеше дозадан тұрады, арасы уақытпен бөлінеді. Сол себепті екпені сапарға 1–2 ай қалғанда бастау ұсынылады. Бұл иммунитет қалыптасуына және екпенің ықтимал жанама әсерінен аман өтуге мүмкіндік береді.
Қандай екпе қажет екенін қайдан білуге болады?
- Тұрғылықты жердегі емханадағы дәрігерден кеңес алыңыз.
- Сыртқы істер министрлігі немесе Дүниежүзілік денсаулық сақтау ұйымының (ДДСҰ) ресми сайтынан ел талаптарын тексеріңіз.
- Халықаралық вакцинация сертификатын рәсімдеуді ұмытпаңыз.
