Алаштың ардақтыларына ескерткіш орнатқан Шымкент әкімдігі сынға қалды. Қоғам белсендісі тарихты бүрмалаған, тірісінде тіл табыспаған азаматтардың ұстанымын ажырата алмаған әкімдіктің әрекетін ашып берді, деп хабарлайды Todayinfo агенттігі.
Журналист Ораз Әлімбет мегаполистің ортасындағы ескерткіштің идеологиялық тұрғыда теріс орнатылғанын айтты.
«Мұстафа Шоқай алашордашыл болды ма? Идеология деген тарихтағы нақты оқиғаға және фактіге сүйенбейтінін Шымкент әкімдігі тағы да көрсетті. Көзі ашық халықтың билікке сенбейтіні сондықтан ғой…», — деп жазды ол.
Шымкенттегі орталық саябақтың алдына «Алаш жолы» атты ескерткіш орнатылған. Онда түркістаншыл Мұстафа Шоқай Ә.Бөкейханов, А.Байтұрсынов секілді алашордашылармен бірге алшаң басып барады.
«Ақиқатында, М.Шоқай «алаш жолымен» жүрмеген. Бөкейхановтар Ресей құрамындағы қазақтың автономиясын ғана аңсады, ал Шоқай Ресейден тәуелсіз ел құру ұстанымынан қайтпады. Міне, дәл осы принцип үшін Шоқай мен алашордашылардың арасы ажырады. Алашордашылардың арманы орындалды – Қазақ АССР, кейін СССР құрамындағы Қазақ ССР болды. Алашордашылар қолдамағандықтан, Қазақ даласынан орын таппай Қоқанда М.Шоқай құрған Түркістан Республикасын совет әскерлері қиратты, ал Мұстафа шетел асып қашты, сол жақта мерт болды. Өмірі үзілгенше Қазақ елінің Тәуелсіздігін армандап өтті бұ дүниеден…
Ал Шымкент әкімдігі М.Шоқайды «Алаш жолымен» жүргізіп қойды… Мұндай өтірік ескерткішке кім сенеді, өтірік идеологияға кім иланады?!. Билік басында отырғандар атам қазақтың «Өтіріктің құйрығы бір тұтам» деген сөзін ешқашан ұқпайтын болды ғой, эх…», — деп жазды журналист.
Оның бұл сынын әлеуметтік желі қолданушылары да қостап, Шымкент билігінің білместігін бірен соң бір мінеп жазды.
«Тарихшылар үшін ойланатын жағдай», «Алаш арыстарының жолы Қазақ автономиясын құру болса, Мұстафа Шоқайдың жолы басқа болды.Билік екеуін біріктіріп қойыпты», «Ну, қоса салыңдар деген ғой мәдениетке жауапты кісі мәдениетті түрде..», деп жазды оқырмандар.
Фото: Ораз Әлімбеттің Facebook парақшасынан
