Астана қаласында өткен Дженнифер Лопестің концерті кезінде қоғамдық тәртіпті сақтауға ІІМ-нің қызметкерлері, Ұлттық ұланның әскери қызметшілері, жеке күзет агенттіктерінің өкілдері және 500-ден астам волонтер жұмылдырылды, деп хабарлайды Todayinfo Polisia-ға сілтеме жасап.
Көрермендердің қолайлығы үшін “Астана Арена” стадионына бес негізгі нүктеден — “Астана” циркі, “Хазрет Сұлтан” мешіті, “Қазақстан” спорт сарайы, Бас мешіт және EXPO аумағынан әр 30 минут сайын шамамен 100 автобус қатынады. Бұл көлік ағынын оңтайландырып, кептелістердің алдын алуға мүмкіндік берді.
Іс-шара кезінде патрульдік және учаскелік полиция, криминалдық қызмет өкілдері құқықбұзушылықтың алдын алу мақсатында кезекшілік атқарды. Жол-патрульдік полиция қозғалысты реттеп, жол-көлік оқиғаларына жол бермеді.
Сондай-ақ бірнеше баланың және жеке заттардың жоғалуы туралы хабарламалар тіркеліп, полиция қызметкерлері оларды жедел тауып, иелеріне қайтарды.
Шетелдік қонақтарға туристік полиция ақпараттық және құқықтық қолдау көрсетті. Туристерге қала бойынша бағдарлау, қажетті нысандарға бағыттау және қауіпсіздікке қатысты көмек көрсетілді.
Қала тұрғындары мен қонақтары концерт барысында қауіпсіздікті қамтамасыз еткен тәртіп сақшыларына ризашылықтарын білдірді.
Фото: @jlo
