Қазақстандық қоғам белсендісі әрі блогер Сырым Абдрахманов 6 жасар қызының бұрынғы қайын атасы тарапынан азғындық әрекетке ұшырағанын мәлімдеді. Оның айтуынша, бүлдіршін бұл жайтты алғаш болып өз апасына айтқан, кейін полицияға да баяндаған. Алайда, күдікті қазірге дейін бостандықта жүр, ал жәбірленуші сол үйде тұрып жатыр, деп хабарлайды Todayinfo.kz.
Абдрахманов бұл туралы Instagram парақшасында жазды. Ол қызының әурет жеріне анасының бұрынғы күйеуі – яғни нағашы атасы қол жүгірткенін айтты.
«Балалармен әпкесінің үйіне барғанбыз. Кетер кезде анам қызымнан ‘біреу ренжітті ме?’ деп сұрағанда, қызым нағашы атасының әурет жерінен ұстағанын айтты. Бұл туралы айту маған өте ауыр, бірақ үнсіз қалу мүмкін емес», – деді Сырым.
Оқиғадан кейін 26 шілде күні полицияға жүгінген. Сол күні жедел-тергеу тобы мен ұйымдасқан қылмысқа қарсы күрес басқармасы оқиға орнына барған. Қыздың анасының қатысуымен жауап алынған. Сырымның сөзінше, полицейлер бала оқиғаны видеотіркеу құрылғысының алдында растағанын жеткізген.
27 шілдеде Қылмыстық кодекстің 124-бабы 1-бөлігі бойынша (он алты жасқа толмаған балаға қатысты күш қолданбай азғындық әрекеттер жасау) іс қозғалған.
Дегенмен, Абдрахманов күдіктінің әлі күнге дейін жауапқа тартылмағанына, ал қызының сол үйде тұруын жалғастырып жатқанына алаңдаулы.
«Қызым әлі күнге дейін нағашы атасының үйінде, сол адамның қарауында қалуда. Бұл барып тұрған сорақылық емес пе?», – деді ол.
Осы жайтқа байланысты Ақтөбе облыстық полиция департаменті тергеу жүріп жатқанын растады.
«Іс жан-жақты, объективті тергелуде. Қазіргі таңда кәмелетке толмаған баланың анасымен бірге басқа жерге көшірілуі қамтамасыз етілді. Қылмыстық істі бақылауға алғанбыз. Балаға қатысты мәліметтерге байланысты өзге ақпарат жарияланбайды», – делінген ведомство жауабында.
