Қытайдың Іле қазақ автономиялық облысына қарасты Моңғолкүре ауданында аспалы көпір үзіліп, 5 адам қаза тапты, деп хабарлайды Todayinfo агенттігі.
Қайғылы оқиға 6 тамыз күні түстен кейін болған. Шаты туристік аймағының аумағындағы аспалы көпірдің қос арқанының бірі үзіліп, көпір беті бір жағына қарай қисайып қалған. Синьхуа агенттігінің мәліметінше, 29 адам көпірден өзен арнасына құлаған. 5 адам оқиға орнында қаза болып, 22 адам жеңіл жараланған, тағы 2 адамның жағдайы ауыр деп бағаланып отыр.
Жергілікті әкімдіктің хабарлауынша, жаралы жандардың барлығы ауруханаға жеткізіліп, ем қабылдап жатыр. Трагедиядан кейін Шаты туристік аймағы уақытша жабылды.
Шаты туристік аймағы Тяньшань тауының етегінде орналасқан, аумақ әсем табиғатымен бүкіл Қытайға белгілі.
Іле облысының Моңғолкүре аймағы Қазақстанның Райымбек ауылымен шекараласады.
Фото: видеодан кадр
