Шағын және орта кәсіпкерлік Шортанды ауданының экономикалық және әлеуметтік тұрақтылығының маңызды тіректерінің бірі болып қалып отыр. Бүгінде ауданда сауда, қызмет көрсету, ауыл шаруашылығы, сондай-ақ тамақ және жеңіл өнеркәсіп салаларында жұмыс істейтін 1,5 мыңға жуық ШОК субъектісі тіркелген. Олардың басым бөлігі ішкі нарыққа бағытталғанымен, өз өнімдерін Қазақстаннан тыс жерлерге экспорттап жүрген кәсіпорындар да бар, деп хабарлайды Todayinfo ақпараттық агенттігі.
Жергілікті билік өкілдерінің айтуынша, шағын және орта кәсіп иелері жұмыс орындарын құрып қана қоймай, аудан бюджетінің толықуына үлес қосып, кәсіпкерлік белсенділікті арттырып, бәсекелестік ортаның дамуына ықпал етуде.
Аудан экономикасында өнеркәсіп саласының да үлесі зор. Қазіргі таңда Шортанды ауданында пайдалы қазбалар өндіретін және ауыл шаруашылығы шикізатын қайта өңдейтін 11 өнеркәсіптік және жер қойнауын пайдаланушы кәсіпорын жұмыс істейді. Мұнда пайдалы қазбалар өндіру, құрылыс материалдарын шығару және азық-түлік өндірісі – атап айтқанда, ұн, құрама жем, ет пен сүт өнімдерін шығару салалары дамып келеді.
Аудан өнеркәсібінің жетекші кәсіпорындарының бірі – Шортанды кентінің өндірістік аймағында орналасқан «ABM AGRO» жауапкершілігі шектеулі серіктестігі. Кәсіпорын ауыл шаруашылығы өнімдерін өңдеумен айналысады. Мұнда жоғары, бірінші және екінші сұрыпты бидай ұны, құрама жем және кебек шығарылады. Бұл өнімдер мал шаруашылығында кеңінен қолданылады. Зауыт ай сайын 4500 тоннаға дейін өнім өндіруге қауқарлы. Өнімді тасымалдауды жеңілдету үшін кәсіпорын аумағында жеке теміржол тұйығы мен Астана–Петропавл автожолына тікелей шығатын жол бар. Бұл ішкі және сыртқы нарыққа үздіксіз өнім жеткізуге мүмкіндік береді.
Кәсіпорын басшылығының мәліметінше, «ABM AGRO» өнімін шетелге де экспорттайды, өнімді сақтау мен қаптау бойынша заманауи технологияларды енгізіп, халықаралық стандарттарға сай болуға және бәсекеге қабілеттілікті сақтауға күш салады. Сонымен қатар кәсіпорын әлеуметтік бастамаларға да белсене қатысады: жергілікті әкімдікпен әріптестік орнатып, түрлі жобаларды қолдайды және ауыл шаруашылығы жәрмеңкелерінде өнімдерін төмендетілген бағамен ұсынады.
Бүгінгі таңда Шортанды ауданының экономикасы шағын бизнес пен өнеркәсіптің ұштасуымен дамуда. «ABM AGRO» секілді кәсіпорындар экономикалық тиімділікті әлеуметтік жауапкершілікпен қатар алып жүруге болатынын дәлелдеп отыр.
