АҚШ пен Ресей президенттері Владимир Путин мен Дональд Трамп алдағы күндері жоғары деңгейдегі екіжақты кездесу өткізетін болды. Бұл туралы Ресей президентінің көмекшісі Юрий Ушаков мәлімдеді.
«Америкалық тараптың бастамасымен Путин мен Трамптың кездесуі жөнінде келісім қағидатты түрде мақұлданды. Қазіргі уақытта тараптар кездесуді нақты пысықтауға кірісті», – деді Ушаков.
Кремль өкілі атап өткендей, кездесудің уақыты мен орны келісілген, алайда нақты ақпарат жарияланған жоқ.
Зеленскийсіз формат
АҚШ арнайы өкілі Стив Уиткофф бұған дейін Путин, Трамп және Зеленскийдің қатысуымен үшжақты саммит өткізуді ұсынған. Алайда бұл ұсынысқа Мәскеу жауап қатпаған, дейді Ушаков.
Еске салайық, Дональд Трамп шілде айында Ресейге Украинамен бейбіт келісімге келу үшін 50 күндік ультиматум қойған болатын. Кейін бұл мерзім 10–12 күнге дейін қысқартылған. Ультиматум мерзімі 8 тамызда аяқталады.
