Армения мен Әзербайжан басшылары жұма күні АҚШ президенті Дональд Трамптың қатысуымен Вашингтонда екі ел арасындағы бейбіт қатынастар туралы декларацияға қол қойды, деп хабарлайды Todayinfo BBC-ге сілтеме жасап.
Декларацияға Армения премьер-министрі Никол Пашинян мен Әзербайжан президенті Ильхам Әлиев қол қойды. Онда бұрын келісілген бейбітшілік келісіміне қол қою және оны ратификациялау ісін ілгерілету қажеттігі атап өтілген.
Вашингтонда Әзербайжан мен Арменияның сыртқы істер министрлері келісімшартты парафирледі, яғни келісілген мәтінді бекітті.
Декларация мәтінінде Әлиев, Пашинян және Трамп Әзербайжан Республикасы мен Армения Республикасы арасындағы бейбітшілік пен мемлекетаралық қатынастарды орнату туралы келісімнің мәтініне параф қойғаннан кейін, «Келісімге қол қою және оны кейіннен ратификациялау үшін қосымша қадамдар жасаудың қажеттігін мойындағаны, сондай-ақ екі ел арасындағы бейбітшілікті қамтамасыз ету мен нығайтудың маңыздылығын атап өткендері» жазылған.
Сонымен қатар, декларацияда аймақтағы коммуникацияларды ашудың және Әзербайжанның негізгі аумағы мен оның эксклавы Нахичеванды Армения аумағы арқылы, Иранмен шекара бойымен жалғайтын көлік дәлізін құрудың маңызы айтылған.
Бұл дәліз «Халықаралық бейбітшілік пен өркендеу үшін Трамп бағыты» (TRIPP) деп аталды.
2020 жылғы қарашада, Әзербайжан армиясы Таулы Қарабақта армян күштерін талқандап, 1990-жылдардың басында армяндар басып алған Әзербайжан аудандарын бақылауға алғаннан кейін, Пашинян мен Әлиев атысты тоқтату туралы келісімге Мәскеуде, Ресей президенті Владимир Путиннің қатысуымен қол қойған еді.
Енді олар бейбітшілік декларациясына Вашингтонда қол қойып отыр, ал Мәскеу реттеу процесінен шеттетілген. Декларацияда, басқа жайттармен бірге, Армения мен Әзербайжанның ЕҚЫҰ Бас хатшысына жүгініп, Қарабақ қақтығысын реттеумен айналысуға тиіс болған Минск тобын таратуын сұрағаны жазылған. Бұл топтың тең төрағалары Ресей, Франция және АҚШ болған.
«Ресей Таулы Қарабаққа байланысты қақтығыста Армения мен Әзербайжан арасындағы жалғыз төреші болғысы келді, бірақ Украинаға басып кіру Мәскеудің аймақтағы беделін әлсіретті, енді екі елдің басшылары оның орнында Американы көргісі келеді», — деп түсіндіреді BBC-дің Орыс қызметінің тілшісі Григор Атанесян.
Фото: Getty images
