Көкше жерінде қазақ руханиятының шамшырағы, ұлттың ұлы ұстазы Абай Құнанбайұлының 180 жылдық мерейтойына арналған «Абай әлемі» атты мәдени арбат өтті. Шараға Ақмола облысы әкімдігінің басшылығы, зиялы қауым өкілдері мен қонақтар қатысты. Ашық аспан астында, қаланың көркем жағалауында өткен бұл мереке ұлттық болмыс пен заманауи өнердің тоғысын паш етіп, мыңдаған көрермен мен қатысушыны бір алаңға тоғыстырды, деп хабарлайды Todayinfo ақпараттық агенттігі.
Мәдени арбат ақынның әні де шықалып, өлеңдері оқылды. Әрбірі Абай мұрасының бір қырын ашып, қалың жұртты өнер мен ойдың биігіне жетеледі. «Ұлттық әуен аймағында» өткен «Абай дана, Абай дара» фольклорлық ансамбльдер фестивалі сахна төрінде қазақтың бай музыкасын жаңғыртты. «Әнді сүйсең, менше сүй» вокалдық алаңы жас орындаушыларға Абай әндерін дәстүрлі, академиялық және эстрадалық жанрларда шырқатса, «Қазақша караоке» көпшілікті думанға бөледі.
Әдебиет сүйер қауым «Өлең сөздің патшасы» аймағында ақындар мүшәйрасын тамашалап, кітап көрмелері мен жәрмеңкелерден рухани азық алды. «Даналық бастауы – Абай» театр алаңы мен «Жыл мезгілдері» бейнелеу өнері байқауы кемеңгер ойшылдың даналық сөздері мен поэзиясын сахна мен қылқалам тілімен сөйлетті. «Шеберлер шаһарында» ұлттық қолөнер бұйымдары ұсынылса, бас сахнада Кенжебек Күмісбеков атындағы оркестр мен Қазақстанның еңбек сіңірген әртістері, «Көкшетау» мәдениет сарайының шығармашылық ұжымдары салтанатты концерт қойды.
Облыс әкімінің орынбасары Досұлан Айтбаев Абайдың Көкше өңірі үшін маңызын ерекше атап өтті.
«Көкше өңірі – ән мен жырдың, сал-серілердің қасиетті мекені. Осы өлкеде Біржан сал мен Абай Құнанбайұлының кездесуі – тарихта қалған айрықша оқиға. Абайдың әнге ғашық болып, табиғат лирикасы мен адам жанына үңілетін әндер жазуына Біржан салдың ықпалы тигенін айтуға болады.Абай армандаған кемел қоғамды бірге құрайық», – деді ол.
Біржандай өнердің асқақ тұлғасын көргенде шабыт алып, шығармашылық биікке ұмтылмау мүмкін емес. Бір дәуірде өмір сүрген бұл ұлы тұлғалардың туындылары халықтың жан-дүниесімен үндесіп, болмысымен біте қайнасты. Облыс көлемінде Абай жылына орай өткізілген конференциялар, әдеби байқаулар мен көрмелер – өскелең ұрпақты рухани байлыққа жетелейтін игі істердің айғағы. Сондай ақ мереке аясында М.Жұмабаев атындағы облыстық әмбебап ғылыми кітапхана да өз үлесін қосып, ақынының шығармаларын көпшілік назарына ұсынды.
«Біздің кітапхана ұлы ақынның 180 жылдығын атап өтуге белсенді қатысып отыр. «Мәдени арбат» аясында Абай шығармашылығының әртүрлі кезеңдері мен жанрларын қамтитын кітап көрмесін ұйымдастырдық. Сондай-ақ, алдын ала өткізілген шығармашылық байқаудың үздік жұмыстарын көпшілік назарына ұсынып, бүгін оның қорытындысын жарияладық. Байқауға өңіріміздің түкпір-түкпірінен қатысушылар келді», – деп атап өтті кітапхана қызметкері Жадыра Әубакирова.
Осылайша, Көкше төрінде өткен «Абай әлемі» мерекесі ақын мұрасын ұлықтаумен қатар, елдің мәдени бірлігін, рухани жаңғыруын дәріптеген ұлы думан ретінде есте қалды.
Қала тұрғындары мен қонақтары үшін мерекелік шара кешке сағат 19:00 Абайдың әндерімен жалғасады. Жаңа жағалауда өтетін ән кешіне баршаңызды шақырамыз!
