Максимовка ауылында дәрігерлік амбулаторияның құрылысы аяқталуға жақын

Ақмола облысында медициналық инфрақұрылымды нығайту және дамыту бағытында жүйелі жұмыс жалғасуда. Соңғы жылдары өңірде ауруханалар, емханалар, дәрігерлік амбулаториялар мен фельдшерлік-акушерлік пункттерді жаңғыртуда айтарлықтай ілгерілеу байқалды.
Осындай жұмыстардың жарқын мысалы – Сандырақтау ауданының Максимовка ауылында салынып жатқан дәрігерлік амбулатория. Жаңа нысан Максимовка, Владимировка, Спасское, Дорогинка, Богородка, Красная Поляна, Петриковка, Арбузинка, Новый городок және Мәдениет ауылы тұрғындарының көптен бергі мәселесін шешуге мүмкіндік береді. Қамту аймағында шамамен 4 мыңға жуық адам бар.
«Амбулатория заманауи бір қабатты кірпіш ғимарат болады. Ол бір ауысымда 25 қабылдауға есептелген. Мұнда тіркеу бөлімі, күту залы, дәріхана пункті, фельдшер кабинеттері, процедуралық және екпе бөлмелері, қарау кабинеті, стерилизациялық, талдау алу бөлмесі және дәрі-дәрмек сақтайтын қоймалар қарастырылған. Ғимарат мүмкіндігі шектеулі адамдарға бейімделген – дәліздері кең, пандустар, ыңғайлы санитарлық тораптар, табалдырықтар мен еден деңгейінің айырмашылығы жоқ», – деді «Ел-құрылыс» ЖШС-нің бөлім бастығы Бағлан Құсайынов.
Амбулаторияда 15 маман жұмыс істейді. Бұл жергілікті тұрғындар үшін медициналық көмектің қолжетімділігін және жеделдігін айтарлықтай арттырады.
«Мен көп жылдан бері зейнеттемін, жасы келген адамдардың ем алу үшін ауданға баруы қаншалықты қиын екенін білемін. Бірде автобус болмайды, бірде ауа райы қолбайлау болады, ал ауру күтіп тұрмайды ғой. Біздің ауылда амбулатория салынып жатқанын естігенде, жаным тынышталып қалды. Мұнда дәрігерлер де, процедуралар да, барлық қажетті кабинеттер де болады – ондаған шақырым жол жүрмейміз. Қарт адамдар үшін бұл өте маңызды, ал жас отбасылар мен балалар да айырмашылықты бірден сезеді», – дейді Максимовка ауылының тұрғыны Зоя Мячик.
Айта кету керек, облыста қазіргі уақытта денсаулық сақтау саласында 14 маңызды жоба жүзеге асырылып жатыр. Алдағы жылдары тағы 38 алғашқы медициналық-санитарлық көмек нысанының құрылысы жоспарланған: 21 фельдшерлік-акушерлік пункт, 14 дәрігерлік амбулатория және 3 медициналық пункт. Бұл бастамалар қалалар мен ауылдарды толық қамтиды, сонымен бірге ерекше көңіл шағын елді мекендерге бөлінуде. Билік өкілдері атап өткендей, басты мақсат – әрбір тұрғынды, тұрғылықты жеріне қарамастан, сапалы медициналық қызметпен қамтамасыз ету.