2025 жыл Қазақстанда Жұмысшы мамандықтары жылы болып жарияланды. Бұл бастама техникалық және кәсіптік білім беруді дамытуға, сонымен қатар экономика үшін аса қажет білікті кадрларды даярлауға бағытталды, деп хабарлайды Todayinfo ақпараттық агенттігі.
Соның айқын үлгісі – Көкшетау жоғары техникалық колледжі. Мұнда теориялық білім тәжірибемен ұштасады: студенттер дуальды оқыту жүйесі аясында сабақпен қатар өңірдің алдыңғы қатарлы кәсіпорындарында жұмыс істеп, кәсіби дағдыларын жетілдіреді, деп хабарлайды облыстық Ішкі саясат басқармасының ресми сайты.
«Қазіргі таңда мектеп бітіруші түлек тек қолымен немесе ақылымен жұмыс істеп, қана қоймай, екеуін де қатар меңгеруі маңызды. Ал дуальды оқыту жүйесі студенттерге өндірісте өз орнын тез табуға мүмкіндік береді», – деп атап өтті колледж әдіскері Тілек Сәбитова.
Болашақ мамандар халықаралық деңгейдегі WorldSkills чемпионаттарына белсене қатысып жүр. Олардың жеңістері мен жетістіктері жұмысшы мамандықтардың беделі артып, бұл мамандықтардың бәсекеге қабілетті бола түскенін айқын дәлелдейді.
«WorldSkills жеңісі менің дұрыс таңдау жасағанымды дәлелдеді. Енді өз мамандығымның үлкен мүмкіндіктерге жол ашатынына нық сенімдімін», — деді колледж студенті, облыстық кезеңнің жеңімпазы Александр Цалько.
Колледж Индустрия 4.0 дәуіріне нық қадам басты. Білім ордасында робототехника зертханалары, VR оқу орталықтары, сондай-ақ электромобильдерді диагностикалауға арналған арнайы аймақтар жұмыс істейді. Мұндай мүмкіндіктер студенттердің заманауи технологияларды игеруіне жол ашып, еңбек нарығында бәсекеге қабілетті болуына ықпал етуде.
Колледж әдіскері Тілек Сәбитова оқу орнының бүгінгі студенттерді ертеңгі мамандықтарға дайындап жатқанын атап өтті.
«Біз жастарды робот техникасымен жұмыс істеуден бастап, электромобильдерге қызмет көрсетуге дейінгі заманауи бағыттарға үйретіп келеміз», – деді ол.
Колледж халықаралық байланыстарға да айрықша көңіл бөлуде. Студенттер Ресей мен Азия елдеріндегі кәсіпорындарда тәжірибеден өтіп, әлемдік деңгейдегі компаниялармен жұмыс істеу мүмкіндігіне ие. Бұл өз кезегінде олардың кәсіби көкжиегін кеңейтіп, еңбек нарығында сұранысқа ие маманға айналуына жол ашады.
«КАМАЗ зауытындағы тағылымдама біз үшін баға жетпес тәжірибе болды. Сол арқылы алған біліміміздің халықаралық стандарттарға толық сәйкес келетініне көз жеткіздік», – деді машина жасау мамандығының студенті.
Болашақ колледж мамандары бүгінде аймақтың дамуына тікелей үлес қосып жүр. Олар жиһаз бен қалалық инфрақұрылым элементтерін өндіруден бастап, түрлі өндірістік тапсырыстарды орындауға дейін белсене атсалысуда.
«Қаладағы еңбегіңіздің нәтижесін өз көзіңізбен көрген сәтте таңдаған мамандығыңыздың қаншалықты құнды екенін түсінесіз», – дейді колледждің құрылыс бөлімінің студенті.
Ақмола облысында өтіп жатқан «Жұмысшы мамандықтары жылы» жұмысшы кәсіптердің кешегі күннің сарқыншағы емес, сенімді болашақтың кепілі екенін айқын көрсетті. Бүгін даярланып жатқан жас кадрлар ертең қуатты экономиканың берік негізіне айналмақ.
