Қостанай облысының әкімі Құмар Ақсақалов облыстық денсаулық сақтау басқармасының бұрынғы басшысы Данияр Жандаевтың қамауға алынуына қатысты пікір білдірді, деп хабарлайды «Наша Газета».
«Қостанай облысының әкімі Құмар Ақсақалов бүгін, 27 тамызда, облыстық мәслихат сессиясында өз жұмысын қорытындылап, есеп берді. Депутат Алесандра Сергазинованың сұрағына жауап бере отырып, ол облыстық денсаулық сақтау басқармасының бұрынғы басшысы Данияр Жандаевтың қамауға алынуына қатысты жағдайға тоқталды», – делінген хабарламада.
«Наша Газетаның» ақпаратына сүйенсек, кеше әлеуметтік желілерде Жандаевқа қатысты істі ҰҚК тергеп жатқаны туралы мәлімет тараған. Тексерулердің денсаулық сақтау басқармасының қызметін де қамтитыны хабарланды. Сонымен қатар, қызмет назары орталық аудандық ауруханалардың бірқатар бас дәрігерлеріне де аударылған. Желіде тараған деректерге қарағанда, мәселе мемлекеттік сатып алулар кезіндегі заңбұзушылықтарға қатысты болуы мүмкін.
«Бұл іспен прокуратура айналысып жатыр. Олар өз бағасын береді. Бұдан артық түсініктеме бере алмаймын. Біздің не сатып алынып жатқанын көру мүмкіндігіміз жоқ, денсаулық сақтау жүйесінің өзі реттейді. Ал енді осы жарияланымдарға байланысты тергеу аясында бәрі анықталады. Бірқатар олқылықтар болғандықтан, соның ішінде осы себепті ол жұмыстан босатылды. Барлығы кадрға байланысты… Әрине, бақылауды жақсарта түсу қажет екені түсінікті, соның ішінде депутаттар тарапынан да. Мен мынадай ұсыныс айтамын: осы механизмді ойластырайық. Әрбір медициналық мекемедегі байқаушы кеңестердің жұмысы бар – олар көреді, естиді, не сатып алынатынын, соған қажеттілік бар-жоғын біледі. Сондықтан бақылауды күшейту үшін бұл жүйені реттеп, жетілдіруіміз қажет», – деді облыс әкімі.
Жандаев 2025 жылдың шілде айының ортасында қызметінен кеткен болатын. Ол кезде облыстық денсаулық сақтау басқармасының баспасөз қызметі бұл шешімнің себебі оның көшуіне және тұрғылықты жерін ауыстыруына байланысты екенін хабарлаған еді.
