Атырауда бұрынғы IT маман мектеп директорын ұл балаларға қатысты азғындық әрекеттерге барды деп айыптады, деп хабарлайды Todayinfo.kz
Оның айтуынша, 2013 жылы өзі №30 мектепке жұмысқа орналасқаннан кейін, директордың орынбасары біліктілік санатын алуын, ал өзі алғашқы жалақысын алуын ұжымда атап өткен.
Отырыс оқу ісі меңгерушісінің пәтерінде өткен. Жас маманның айтуынша, сол отырыста дастарқан басына отырғанын біледі, ал ары қарай есінде ешнәрсе жоқ. Таңертең оянғанында толықтай жалаңаш күйде жатқан.
«Пәтерде тағы екі ер адам болды. Завуч маған: «Біздің әлемге қош келдің. Енді сен де бізбен біргесің» деді», – деп еске алды ол.
Осыдан кейін, оның сөзінше, ол аталған адамдармен араласа бастаған. 12 жылдан соң бұл жайлы ашық айтуға бел буған, өйткені сол кездегі оқу ісінің меңгерушісі қазір қаладағы мектептердің біріне директор болып тағайындалған.
«Ол әрдайым менен жасы кіші ұл балаларды тауып беруді сұрайтын», – деп мәлімдеді ер адам.
Оқиғаға қатысты облыстық Білім басқармасының баспасөз қызметі пікір білдірді. Ведомствоның мәліметінше, арнайы тексеру тағайындалған.
«Білім басқармасы тарапынан тексеру жүргізіледі. Сонымен қатар аталған өтінішті жариялаған азаматқа құқық қорғау органдарына жүгініп, жағдайды құқықтық бағытта жан-жақты әрі объективті қарастыруды ұсынамыз», – делінген хабарламада.
Фото: pixabay
