2 қыркүйекте еліміздің 8 мыңнан астам мектебінде жаңа оқу жылы ашылады. Биыл 4,1 миллионнан аса оқушы сабаққа кіріседі. Олардың ішінде 341 мың бала алғаш рет мектеп табалдырығын аттап, 1-сыныпқа барады. Бұл – еліміздегі ең үлкен білім көші. Сонымен қатар, 232 мың оқушы 11-сыныпқа өтті, деп хабарлайды Todayinfo ақпарат порталы.
Мектептерде тек оқу емес, жаңа талаптар мен жаңартылған бағдарламалар да енгізілмек.
Президент Жолдауы
8 қыркүйекте Мемлекет басшысы Қасым-Жомарт Тоқаев Парламент палаталарының бірлескен отырысында халыққа дәстүрлі Жолдауын жасайды. Бұл құжатта алдағы жылдарға арналған саяси-экономикалық бағыттар айқындалады.
Мектеп асханасындағы жаңа стандарттар
1 қыркүйектен бастап мектеп асханаларында тамақтанудың жаңа ережесі күшіне енеді.
Енді тағамдардағы қант, тұз және май мөлшері азайтылады;
Газды сусындар, чипсы, гамбургер, наггетс, сағыз, тәтті сусындар, балмұздақ сияқты өнімдерге толық тыйым салынады;
Ас мәзірінде жаңа піскен көкөніс, жеміс-жидек пен табиғи өнімдердің үлесі көбейтіледі.
Ал асханасы жоқ білім беру ұйымдарында оқушыларға арнайы ланч-бокстар беріледі. Оның ішінде ыстық бутерброд, йогурт, жеміс және сусын болады. Бұл өзгерістер балалардың дұрыс тамақтануына жағдай жасауға бағытталған.
Шәкіртақы өседі
Студенттер үшін тағы бір жағымды жаңалық – шәкіртақы көлемі артады:
Бакалавриат: 52 372 теңге (бұрын 47 135 тг)
Магистратура: 117 098 теңге (бұрын 107 061 тг)
Докторантура: 262 500 теңге (бұрын 240 000 тг)
Ал педагогикалық мамандықтарда оқитын студенттердің шәкіртақысы 84 мың теңгеге жетеді (бұрын 75 600 тг).
Жаңа жаза түрі
Әкімшілік құқық бұзушылық туралы заңнамаға түзетулер енгізіліп, 1 қыркүйектен бастап күшіне енеді.
Енді қоғамдық тәртіпті бұзғандарға тек айыппұл ғана емес, міндетті қоғамдық жұмыстар да жаза ретінде қолданылады.
Бұл мынадай жағдайларға қатысты:
Ұсақ бұзақылық жасау;
Көшелер мен қоғамдық орындарды ластау;
Арнайы қызмет көліктеріне (жедел жәрдем, өрт сөндіру, полиция) жол бермеу;
Қоғамдық орындарда алкоголь ішу.
Яғни азамат тек айыппұл төлеп құтылмайды, сонымен қатар қоғамға пайда әкелетін жұмыстарды атқаруға міндеттеледі.
Ақша аударымдарын бақылау
1 қыркүйектен бастап үш ай ішінде 1 млн теңгеден артық ақша аударатын азаматтар салықтық бақылауға алынады. Бұл ереже заңсыз табыстардың айналымын азайтуға бағытталған.
Алайда қаржы вице-министрі Ержан Біржановтың айтуынша, туыстар арасындағы аударымдар салық органдарының бақылауына кірмейді. Яғни жақындарыңызға қаржы жіберсеңіз, ешқандай тексеріс жүргізілмейді.
Зейнетақы жүйесіндегі жаңалықтар
1 қыркүйектен бастап зейнет жасына жеткен азаматтарға төлемдер өтінішсіз автоматты түрде тағайындалады.
Қосымша өзгерістер:
Зейнетақы жарналарын ұстап қалу тәртібі жеңілдетіледі;
Мүгедектігі бар азаматтардың кей табыстарынан жарна ұсталмайды;
Қайтыс болған адамның туыстарына жерлеу рәсіміне біржолғы төлем беріледі;
Шоттағы қаражат ең төменгі зейнетақыдан аз болса, қалдық толықтай отбасыға қайтарылады.
Астана әуежайының жабылуы
Елорда әуежайының ұшу-қону жолағы жөндеуге байланысты уақытша жабылады:
1–4 қыркүйек аралығы;
8 қыркүйектен 31 қазанға дейін (күн сайын сағат 10:00–18:00 аралығында).
Жаңа саяси маусым
2 қыркүйекте сағат 11:00-де Парламент палаталарының бірлескен отырысы өтеді. Бұл – жаңа саяси маусымның ресми басталуы.
Жеке қауіпсіздік сабақтары
1 қыркүйектен бастап барлық мектептерде қауіпсіздік сабақтары қайта енгізіледі. Бұл сабақтар оқушыларды төтенше жағдайларда дұрыс әрекет етуге, өз қауіпсіздігіне жауапкершілікпен қарауға үйретеді.
Қарапайым тілмен айтқанда, қыркүйек – Қазақстан үшін жаңа ережелер мен үлкен өзгерістер айы болады: мектептер жаңа стандартқа көшеді, студенттер көбірек шәкіртақы алады, заң бұзғандар қоғамға жұмыс істеуге міндеттеледі, ал ақшалай аударымдар қатаң қадағаланады.
Фото: Литер
