Алматы әкімі Дархан Сатыпалды метроны «Қалқаман» стансасынан «Барлық» базары ауданына дейінгі аралығындағы құрылыс барысын барып көрді.
Алматыда жаңа метро желісінің ұзындығы бес шақырымнан асады. Жобаға үш станция кіреді. Олар Наурызбай аудандық әкімдігі маңында, Алатау даңғылы мен Төле би көшесінің қиылысында және «Барлық» базарының жанында болады. Мұнда қалааралық автобекет, метро, жеңіл рельсті көлік пен автотұрақты біріктіретін ірі көлік хабы құрылмақ.
Ерекше назар «Қалқаман» станциясына аударылып отыр. Оның қызметін тәулігіне 100 мыңнан астам жолаушы пайдаланады деп болжанып отыр. Нысанда негізгі жер қазу жұмыстары аяқталды, бір тоннель толық қазылып, инженерлік жүйелер орнатылып жатыр. Монолит құю жұмыстарының 75%-дан астамы орындалған. Жобада платформа аймағы, екі вестибюль, үш кіреберіс, техникалық блок қарастырылған.
Бас мердігер құрылысты мерзімінен бұрын аяқтауды жоспарлап отыр. Қарашада бетондау жұмыстары аяқталып, инженерлік және әрлеу кезеңі басталады. Құрылғы мен материалдар да алдын ала дайындалып жатыр.
Жоба бойынша жалпы ұзындығы үш шақырымнан асатын екі тоннель салынады. Оның бірі толық қазылып, онда заманауи технологиямен рельс төсеу басталды. Бұл пойыздардың тыныш әрі жайлы қозғалуына мүмкіндік береді. Екінші тоннельдің қазу жұмыстары жалғасуда, аяқтау келесі жылдың басына жоспарланған.
Осыған дейін Алматыда бұрынғы теміржол ауруханасын қайта жаңарту жұмыстары тағы да кейінге қалғаны туралы жаздық.
