Алматы қаласында қала әкімі Дархан Сатыбалдының тапсырмасына сәйкес, 2025 жылғы 1 қыркүйекке дейін магистральдық көшелерде жүргізілген орташа жөндеу жұмыстары толық аяқталды, деп хабарлайды Todayinfo ақпараттық агенттігі.
Қалалық мобильділік басқармасының дерегінше, ұзындығы 40 шақырым болатын 15 негізгі көше жаңартылды. Бұл көшелердің қатарында Қабанбай батыр, Қажымұқан, Жұбанов, Ұлықбек, Майлин, Бұқтырма, Мөңке би, Бекмаханов, Дулати, Серкебаев, Жароков, Төле би, Бөгенбай батыр, Тілендиев көшелері және Назарбаев даңғылы бар.
Сонымен қатар, жалпы ұзындығы 117 шақырымды құрайтын аудандық маңызы бар 123 көшеде де жөндеу жұмыстары аяқталған. Қазіргі таңда 120 шақырым болатын 188 көшеде жұмыс жалғасуда. Оның 60%-дан астамы қыркүйек айының соңына дейін, ал қалған бөлігінің құрылысы қазанның 20-сына дейін тәмамдалмақ.
Қалалық мобильділік басқармасы биыл 277 шақырымды қамтитын 326 көшені жөндеу жоспарланғанын атап өтті. Бұл көрсеткіш бастапқы межеден 23 шақырымға қысқарған — себебі бірқатар учаскелерде жер асты инженерлік желілерді ауыстыру қажеттілігі туындап, олар уақытша тізімнен алынды.
Сапа – басты назарда
Жөндеу жұмыстарының сапасын бақылау және тексеру мақсатында «Жол активтері ұлттық сапа орталығы» Алматы қалалық филиалы белсенді жұмыс атқаруда. Ұйым мамандары асфальт төсеу, жол төсемесінің біркелкілігі мен материал сапасын жүйелі түрде тексеріп, тиісті сараптамалар жүргізді.
Филиал басшысы Мәулен Әліпов жол сапасына қойылатын талаптардың жылдан жылға қатаңдап келе жатқанын атап өтті:
«Қаланың көше-жол желісін жөндеу кезінде әр материал, әр қабат – қатаң бақылауда. Жөнделген учаскелерден сынамалар алынып, олар зертханалық жағдайда тексеріледі. Сапа – жай талап емес, бұл — тұрғындардың қауіпсіздігі мен жайлылығының кепілі», — деді ол.
Қазіргі таңда Алматыда Алғабас, Шұғыла, Ақжар, Боралдай, Жас Қанат және Рахат-Мәдениет шағынаудандарында жаңа жолдар салу жұмыстары да жалғасуда. Сонымен қатар, магистральдық және радиалды көшелерді өзара байланыстыру бойынша да ірі жобалар іске асырылуда.
