Алматыдағы Dostyk Plaza сауда орталығы кіреберісіне бетін жауып тұратын киім үлгілеріне қатысты арнайы жапсырма ілінді. Бұл жапсырма әлеуметтік желіде үлкен талқы тудырып, қолданушылардың арасында екі түрлі пікірге себеп болды: кейбіреулер мұны Исламға құрметсіздік деп бағаласа, енді біреулері орталықтың шешімін қолдады, деп хабарлайды Todayinfo.kz ақпарат агенттігі.
Dostyk Plaza әкімшілігі түсініктеме беріп, мұндай белгі 2025 жылы қабылданған қоғамдық орындарда бетті толық жабуға тыйым салатын жаңа заңға байланысты қойылғанын айтты.
«Бұл жапсырмалар хиджабқа тыйым салмайды және діни нышандарға еш қатысы жоқ. Шектеу тек адамның беті толық жабылып, жеке басын анықтау мүмкін болмаған жағдайда ғана қолданылады», – делінген хабарламада.
Жапсырмада рұқсат етілген орамал тағу үлгілері жасыл түспен, ал тыйым салынғандары қызыл түспен көрсетілген.
Сауда орталығы әкімшілігінің мәліметінше, сауда орталығының әрекеті заң аясында және дінге қарсы бағытталмаған.
«Сауда орталығының әрекеті заң аясында және дінге қарсы бағытталмаған. 12 шілдеде қоғамдық орындарда бетін толық жабатын киім киюге тыйым салатын заң қабылданды. Біз тек осы заңның талабын орындадық, одан артық ештеңе емес. Хиджаб киюге рұқсат», — деді сауда орталығының әкімшілігі.
Еске сала кетейік, 2025 жылдың 30 маусымында Қазақстан Президенті Қасым-Жомарт Тоқаев қоғамдық орындарда адамның бетін тануға кедергі келтіретін киімдерді киюге тыйым салуды көздейтін заңға қол қойды.
Құжатқа сәйкес, адамның бетін толық жауып, жеке тұлғасын анықтауға мүмкіндік бермейтін барлық киім түрлері мен аксессуарларға тыйым салынады. Тек заңда көзделген ерекше жағдайлар ғана бұған кірмейді — мысалы, медициналық маска тағу, жеке қорғаныс құралдарын пайдалану немесе кәсіби қызметке байланысты киім кию.
Бұл заң қоғамдық қауіпсіздікті қамтамасыз етуге және қажет болған жағдайда азаматтарды оңай анықтауға бағытталған.
