Түркістан облысында өздігінен жүре алмайтын әкесін аямай ұрған жігіт танымал асаба болып шықты. Қатігез жігіт мәдениет үйінде де жұмыс істеген, деп хабарлайды Todayinfo ақпарат агенттігі.
Әлеуметтік желіде әкесін қан-жоса етіп ұрып-соққан жігіттің видеосы бүкіл елді дүрліктірді. Қатігез жігітті білетіндер оның намазхан екенін де жарыса жазды. Түркістан облыстық ПД күдіктінің қамауға алынғанын хабарлады.
«Аталған факті бойынша қылмыстық іс қозғалды. Күдікті ұсталып, уақытша ұстау изоляторына қамауға алынды. Болған оқиғаның мән-жайы анықталуда. Қажетті жедел-тергеу шаралары жүргізілуде, оның нәтижелері бойынша тиісті шешім қабылданатын болады. ҚР ҚПК-нің 201-бабына сәйкес тергеу мүддесіндегі өзге де ақпараттар жария етілмейді, — деп хабарлады облыстық ПД-ның баспасөз қызметі.
Арада біраз уақыт өткенде ұлынан таяқ жеген қарияның қайтыс болып кеткені белгілі болды. Қазақстандықтар әкесін сабаған Алмас Садақбаевтың Instagram аккаунтын тауып алып, бір сағатта фотосының астына екі мыңға жуық пікір — қарғыс жазып тастаған.
«Бағанағы әкесін аяусыз сабаған қанпезер әкесін өлтіріп тыныпты. Өзі намазхан, азаншы, мәдениет үйі қызметкері, тамада екен. Құдайдың көзі тура болсын!», — деп жазды желі қолданушы Бекболат Қаржан.
Қария өздігінен дәретке шыға алмайтындай, жүре алмайтындай мүшкіл халде болған. Әкесін ұрып жатқан есерсоқ намазхан жігіттің әрекетін көршілері видеоға түсіріп алған.
