Фото: Азаттық рухы
Туризм және спорт министрлігі Ойын бизнесін реттеу комитетінің өкілдері танымал блогерлер Ерболат Жанәбілов пен Эльмира Төлегенованың ұйымдастырған ұтыс ойынын заңсыз және күмәнді деп атады, деп хабарлайды Todayinfo.kz
Комитет өкілі Асылбек Мұстафаев:
«Үлкен күмән туғызады. Бұл жерде тіпті алаяқтық белгілері де бар», – деп мәлімдеді.
Ал осы комитеттің тағы бір өкілі Әбдел Балтатегі ұтыс ойынының ашық өтпегенін атап өтті.
«Жеңімпазды анықтауда ашықтық жоқ. Бағдарламаның алгоритмі де көрсетілмеген. 5 мың теңгелік жұбаныш сыйлықтарын немесе iPhone ұтып алғандар қалай анықталғаны туралы ешбір мәлімет жоқ», – деді ол.
Балтатегінің айтуынша, мұндай ұтыс ойындары міндетті түрде тікелей эфирде, лототрон сияқты арнайы жабдықтарды қолдана отырып өткізілуі тиіс.
«Шын мәнінде, бұл тікелей эфирде арнайы жабдықталған лототрондар арқылы жүргізілуі керек еді. Бұл талап орындалмаған. Кешірім сұраймын, бұл – алаяқтық», – деп түйіндеді ол.
