Қырғызстанда құқық қорғау органдары сыбайлас жемқорлық пен қызметтік қылмыстарға қатысты бірнеше істі тергеп жатыр. Бұл туралы ІІМ мен ҰҚМК-нің баспасөз қызметтері хабарлады, деп жазады Todayinfo.
Шуй облысында ірі көлемдегі жерді заңсыз сату фактісі әшкереленді. Тергеу мәліметінше, 2012 жылдан бері ірі жер иелері 200 гектардан астам ауыл шаруашылығы жерлерін заңсыз түрде жеке тұрғын үй құрылысына аударған. Кейін олар бұл учаскелерді бірнеше адамға сатып, азаматтар ақшасыз, жерсіз қалған. Аталған факт ҚК-нің «Жемқорлық» бабы бойынша тіркелді. Бұған дейін бес ірі жер иесі – К.К., Ж.Н., Т.Т., О.А. және К.А. ұсталған болатын. 16 қыркүйекте Сокулук ауданы әкімінің орынбасары С.Р. да қамауға алынды. Тергеу амалдары жалғасып жатыр.
Ош облысында ҰҚМК және ІІМ қызметкерлері Үзген аудандық ішкі істер бөлімінің тергеушісін пара алу кезінде ұстады. Тергеу деректері бойынша, аға лейтенант К.Б.А. қылмыстық істегі күдіктінің туысынан қылмыстық жауапкершіліктен босауға көмектесу үшін 150 мың сом талап еткен. 14 қыркүйекте ол 50 мың сомды қолма-қол алған сәтінде ұсталып, уақытша ұстау изоляторына қамалды.
Сондай-ақ Ыстықкөл облысында капитальді құрылыс басқармасының бұрынғы басшысы У.С.Б. мен «Дельта-Лот» құрылыс компаниясының директоры Х.А. қамауға алынды. Олар Ақ-Суу ауданындағы Кызыл-Кыя ауылында 150 орындық мектеп пен спортзал салу жобасына бөлінген қаржының игерілмей қалуына байланысты тергеліп жатыр. Тергеу деректеріне қарағанда, тендер 2016 жылы өткізілгенімен, құрылыс толық аяқталмаған. У.С.Б.-ның қамауда ұстау мерзімі тергеу барысында тағы екі айға ұзартылды. Адвокат оның қант диабеті мен жүрек ауруы бар екенін айтып, бұлтартпау шарасын жеңілдетуді сұрады.
Құзырлы органдар бұл істер бойынша тергеу жалғасып жатқанын хабарлады.
