Қазақстанның бас прокуроры Берік Асылов әлеуметтік желідегі парақшасында активтерді елге қайтару жұмыстары жайлы жазба жариялады, деп хабарлайды Todayinfo.kz Tengrinews.kz-ке сілтеме жасап.
Толығырақ
Асыловтың айтуынша, қысқа уақыт ішінде прокуратура органдары ауқымды жұмыс атқарған:
«Бұған дейін мұншама көлемдегі қаржыны мұндай қысқа мерзімде қайтару мүмкін болмаған».
1,3 трлн теңгеден астам қаржы олигополия субъектілерінен өндірілді, оның ішінде шамамен 850 млрд теңге мемлекет кірісіне түсті. Бұл қаражатқа 207 су шаруашылығы нысаны, 177 медициналық мекеме, 14 білім беру және спорт нысаны салынуда.
Олигополия субъектілерімен келісімдер жасалып, 5,2 трлн теңге инвестиция тарту міндеттемесі қабылданған. Соның ішінде Алматыда жаңа туристік кешен, түрлі өңірлерде транспорт-логистикалық орталықтар мен зауыттар салынбақ.
Мысалы, салынатын кен байыту комбинаты 3 000-нан астам жұмыс орнын ашып, елдің экспорттық әлеуетін арттырады.
Сондай-ақ, 16 мектеп пен балабақша, 8 дәрігерлік амбулатория мен аурухана, 13 спорт кешені, 16 мәдени-демалыс нысаны бой көтереді. Бұл шамамен 8 000 жаңа жұмыс орнын ашады.
Асыловтың айтуынша, прокуратура барлық жобалардың іске асырылуын қатаң қадағалайды.
Комитет трансформациясы
Бас прокурор Комитеттің жаңа мәртебесін де атап өтті. Бұрынғы Заңсыз активтерді қайтару комитеті енді Инвесторлардың құқықтарын қорғау комитетіне айналады. Оның басты мақсаты – инвестицияға қолайлы әрі түсінікті жүйе құру.
«Жалпы, бұл бағытта жүйелі жұмыс жүргізілуде. Халықаралық құқықтық байланыстар кеңейіп, цифрлық құралдар жетілдірілуде. Жақында мен Сингапурмен келісімге қол қойдым, басқа да қаржы орталықтарымен жобалар пысықталуда. Прокурорлар қазірдің өзінде жалпы құны 87 трлн теңгені құрайтын 1,5 мыңнан астам инвестжобаны сүйемелдеуде», – деді Берік Асылов.
Асыловтың пікірінше, жаңа комитет экономикаға нақты қаржы тарту процесін жылдамдатып, бизнеске сенімді қолдау көрсетеді.
Контекст
12 қыркүйекте Президент Қасым-Жомарт Тоқаев Бас прокурорды қабылдап, заңдылық жағдайы мен активтерді қайтару жұмыстары туралы есеп тыңдады.
8 қыркүйектегі Жолдауында Мемлекет басшысы Комитетті қайта құруды тапсырған болатын.
