Фото: Stan.kz
Қызылордада блогер Ілияс Сариевтің ісі бойынша сот отырысы жалғасуда. Бұл жолы сотқа мүгедектігі бар балалардың ата-аналары қатысып, қалай алданғандарын баяндады. Журналист Руслан Өтепбайдың тәуелсіз бағдарламасында айтылғандай, іс бойынша барлығы 26 жәбірленуші тіркелген, деп хабарлайды Todayinfo.kz ақпарат агенттігі.
Айман есімді жалғызбасты ана сотта куәлік берді. Оның айтуынша, екі баласының бірі ауыр дертке шалдыққан. Емге ақша жинау барысында әріптестерінің кеңесімен блогер Ілияс Сариевке жүгінген.
«Хабарласқан сәтте ол қызымды видеоға түсіруді сұрады. Кейін үйге келіп, “баланың жағдайын бақылауым керек” деп түнге дейін қасымызда болды. Ақша тез жиналып берілетінін айтты. Бірақ алдымен 100 мың теңге аударуды талап етті. Кейін тағы да бірнеше рет ақша сұрады. Барлығы 750 мың теңге жібердім. Наурыз айынан кейін хабарласу мүмкін болмай қалды», – деді ол.
Онлайн қатысқан тағы бір көпбалалы ана да блогерге сенгенін жасырмады:
«Қызымның еміне ақша керек болып, қаңтар айында Ілиясқа жаздым. Ол қасында жүрген жігіттерге ақы төлеу керегін айтты. Бір айда қажетті соманы жинап беремін деп сендірді. Ақшамды қайтарып берсе, кешірім беруге дайынмын», – деді ол.
Сариевтің қорғаушысы Эльнура Кішкенебаева сотта айыпталушыны ақтауға тырысты.
«Бұл істі тергеудің ортасында ғана қолға алдым. Жәбірленушілер айтқан шығынды қайтару мәселесі бар. Бірақ келісім уақыты нақты көрсетілмеген, құжаттарда да мерзім жазылмаған. Сариев барлық видеосын жариялады, тек бір ай кешіктірген», – деді адвокат.
Келесі сот отырысы 25 қыркүйекте өтеді.
