Фото: видео скриншот
Белгілі кітап дүкендері желісі «Меломан» қазақ тілінде кешірім хат жолдап, келісім-шартты бұзбайтынын ресми түрде хабарлады. Бұл туралы баспа жетекшісі Шыңғыс Мұқан мәлімдеді, деп жазады Todayinfo.kz
Бұған дейін баспа өкілдері шарттың орындалмауына байланысты алаңдаушылық білдірген еді. Жағдай оқырмандардың қолдауының арқасында оң шешімін тауып, компания кешірім сұрауға мәжбүр болды.
— «Шыны керек, кешірімге зәру емеспіз. “Меломан” сатпай қойса да, оқырмандарымыз кітапсыз қалмайды. Бастысы шартты орындаса екен дейсің. Жаңа кітаптарымыз оқырмандарымыз сатып алған ақшаны күтіп отыр. Дәл қазір 20 кітап кезекте тұр, бірақ жеткізе алмай отырмыз», — дейді Шыңғыс Мұқан.
Сонымен қатар, енді баспа «Меломанға» қарызға кітап бермейтінін мәлімдеді. Жаңа кітаптарды сатып алған жағдайда дүкен сөрелерінен табуға болады, болмаса оқырмандар оларды Kaspi дүкені арқылы ала алады.
Баспа өкілдері «Меломанның» қазіргі иелері қазақ жігіттері екенін, олардың енді-енді игеріп жатқанын атап өтті. «Меломанның беті қазақша кітапқа да бұрылады деп сенеміз», — делінген мәлімдемеде.
