Фото: видео скриншот
Маңғыстау облысында өткен халықпен кездесуде жергілікті ақсақал өңір басшысы Нұрдәулет Қилыбайға ашық сын айтты, деп хабарлайды Todayinfo.kz ақпарат агенттігі.
Куәгерлердің айтуынша, әкім спорт кешенінде өткен жиынға келгенімен, акт залына жиналған тұрғындармен және ақсақалдармен амандаспай, бірден өз бағытына өтіп кеткен. Бұл әрекет залдағы жұрттың наразылығын туғызды.
Сонда мінберге шыққан ақсақал ашуға беріліп, әкімнің мінез-құлқына реніш білдірді:
«Әкім деген халықпен сөйлесуге, амандасуға міндетті! Халықтың алдына келгенде кішіпейіл болу керек! Ештеңе бітіріп жатқан жоқсыңдар, бәріңдікі құр сөз!» — деді ол.
Ол сондай-ақ әкімнің бұған дейін айтқан «Мені 362 оққағар қорғайды» деген сөзіне тоқталып, былай деп жауап қатты:
«Сені халық қорғамаса, 362 оққағарың да қорғай алмайды!»
Жиналған жұрт бұл сөзді қол шапалақтап қарсы алды.
Әлеуметтік желіде тараған видео аз уақыт ішінде мыңдаған қаралым жинап, қызу талқылануда. Көпшілік ақсақалдың сөзін қолдап, пікір қалдырды:
«Міне, халықтың шын сөзін айтқан адам!» — деп жазды бір қолданушы.
«Осындай батыл ақсақалдар көбейсін, әкімдер бетке айтылған сыннан қорықпасын!» — деп қолдау білдіргендер де көп болды.
Кей пікір иелері, керісінше, «мұндай кездесулер диалогқа емес, эмоцияға айналып бара жатыр» деп атап өтті. Дегенмен көпшілік әкімнің әрекетін халыққа деген салқын қарым-қатынас пен менмендік ретінде бағалап отыр.
