Бүгін, 21 қазанда Алматы қаласындағы Caspian University базасында Рухани келісім күніне арналған Республикалық форум өтті. Іс-шара мемлекеттік органдардың, діни бірлестіктердің, ғылыми қауымдастық пен азаматтық сектордың өкілдерін біріктіріп, қазіргі заманда рухани құндылықтардың маңызын талқылауға арналды, деп хабарлайды Todayinfo.kz ақпарат агенттігі.
Биылғы форумның басты тақырыбы — «Рухани келісім – Қазақстандағы бірлік пен бейбітшіліктің негізі».
Кездесу барысында қатысушылар цифрландыру үдерісінің күшеюі мен жасанды интеллект дәуіріндегі жаңа сын-қатерлер аясында рухани тұтастық пен адамгершілік бағдарды сақтаудың маңызына тоқталды.
Ахмед Хусейн: «Бірлік – ел дамуының бастауы»
Нұр-Мүбарак Египет ислам мәдениеті университетінің ректоры, доктор Ахмед Хусейн Мухаммад Ибраһимқатысушыларды ерекше мерекемен құттықтап, Рухани келісім күнінің қоғамдағы рөлін атап өтті:
«Рухани келісім күні – халқымыздың татулығын, өзара құрмет пен сенімді нығайтатын, дінаралық және конфессияаралық үйлесімділікті дәріптейтін ерекше мереке. Бұл күн бізге бірліктің – ел дамуының бастауы екенін тағы бір еске салады».
Ол Қазақстанның әлемдік деңгейде бейбітшілік пен диалогты нығайту жолында маңызды бастамалар көтеріп келе жатқанын айтты. Соның ішінде Әлемдік және дәстүрлі діндер лидерлерінің съезін бейбітшілік пен өзара түсіністіктің символына айналған бірегей алаң ретінде бағалады.
«Бүгінгі форумның ұраны – Бірлікте – бар береке. Бұл – халқымыздың басты ұстанымын айқын бейнелейтін сөз», – деді Ахмед Хусейн.
Жанна Асанова: «Дін – біріктіру құралы болуы тиіс»
Қазақстан Республикасы Парламенті Сенатының депутаты Жанна Бейсентайқызы Асанова форум қатысушыларына арнаған сөзінде әлемдік тұрақсыздық жағдайында рухани және адамгершілік құндылықтардың рөлі бұрынғыдан да арта түскенін айтты:
«Бүгін, әлемде соғыс пен қақтығыстар өршіп тұрған шақта, біз адамзаттық ынтымақ пен бірліктің құндылығын бұрынғыдан да айқын сезінеміз. Тек парасаттың үніне құлақ асып, рухани негізге оралғанда ғана адамзат шынайы бейбітшілік пен келісімге жете алады».
Сенатордың пікірінше, дін – қоғамды бөлетін емес, біріктіретін күш болуы керек:
«Біз сенім мен діннің қуатын жою емес, жасампаздық құралына айналдыруымыз қажет. Бұл форумның Қазақстан жерінде өтуі – елдің бейбітшілік пен келісім үлгісін паш етеді».
Ол сондай-ақ форумның жай пікір алмасу емес, діни, гуманитарлық және мәдени әріптестіктің жаңа көпірін салатын маңызды бастама екенін атап өтті.
«Бұл форум тек пікір алмасу алаңы ғана емес, ортақ адамгершілік құндылықтарға негізделген берік серіктестіктер орнатуға бағытталған шынайы үндеу болсын. Алла Тағала біздің бірлігімізді нығайтып, ізгілік жолына бастасын», – деді Асанова.
Рухани келісім күніне арналған бұл форум қазақстандық қоғамдағы бірлік, өзара сенім және рухани құндылықтарды сақтау идеясын жаңа деңгейге көтерді.
Іс-шара қорытындысында қатысушылар рухани келісімнің ел тұрақтылығы мен болашағы үшін маңызды фактор екенін атап өтіп, осы бағыттағы ынтымақтастықты жалғастыруға уағдаласты.
Технология мен жасанды интеллект дәуірінде адам баласы рухани тамырынан ажырамауы керек. Рухани келісім мен адамгершілік құндылықтар – кез келген қоғамның даму өзегі.
