Фото: Дмитрий ЕРОФЕЕВ
Жетісу облысында «Таза Қазақстан» бағдарламасы аясында Республика күні қарсаңында Ескелді би, Балпық би, Қаблиса жырау мен Қабанбай батырға арналған ескерткіштерді жөндеу жұмыстары аяқталды. Бұл ескерткіштер Талдықорған қаласында орнатылған. Сонымен қатар облыс орталығында жаңа сквер пайдалануға берілді, деп хабарлайды Todayinfo.kz ақпарат агенттігі.
Бұған дейін қазан айының басында облыс әкімі Бейбіт Исабаев қаланы аралау барысында Ескелді би, Балпық би мен Қаблиса жырауға арналған «Үш ата» ескерткішін қалпына келтіру жұмыстарына қатысты бірқатар ескертпелер айтқан болатын. Мұнан кейін мердігер ұйым тарапынан тиісті шаралар қабылданды, атап айтқанда брусчаткалар ауыстырылып, сатының гранит тастары қайтадан төселді. Мүсіннің бояуы жаңартылды, ескерткіштің маңайы абаттандырылды, жарық шамдары орнатылды.
Сол сияқты Қабанбай батыр ескерткішінің де гранит қаптамалары ауыстырылып, жазбалары жаңғыртылды, монументі мен орындықтар боялды.
Атқарылған жұмыстардың сапасымен қала әкімі Ернат Бәзіл және ардагерлер мен Қоғамдық кеңес мүшелері танысты. Ардагерлер мәдени мұраларымызды сақтаудың маңызы зор екенін тілге тиек етіп, ескерткіштерді жаңғыртқан құрылысшыларға ризашылығын білдірді.
— Ата-бабаларымызға құрмет көрсету – біздің қасиетті борышымыз. Ата-баба мұрасын насихаттап, еліміздің тарихын тереңірек танып-білуіміз қажет, — деді ардагер журналист, «Алаш» сыйлығының иегері Әміре Әрін.
Атап өтсек, облыста жыл басынан бері Ұлы Отан соғысы ардагерлерінің құрметіне арналған 112 ескерткіш ағымдағы жөндеуден өткізілген.
Осы күні облыс орталығының «Бірлік» шағын ауданында 0,62 га болатын жаңа сквер пайдалануға берілді. Онда автоматты суару жүйесі, жарық шамдары орнатылып, газон төселген. Әткеншектер, орындықтар, беседкалар, балалар ойын алаңы бар. Осы скверде күзгі уақытта 175 жапырақты және қылқан жапырақты ағаш егіледі деп жоспарланып отыр. Бұл тұрғындар үшін қолайлы демалыс орны болмақ.
«Бірлік» шағын ауданының тұрғындары сквердің ашылғанына қуанып отыр:
— Төрт жыл бұрын осында көшіп келдім. Енді үйдің жанында керемет паркіміз бар, енді ол таза ауада отырып тынығуға болатын демалыс орнымыз болады. Мектеп те паркке өте жақын орналасқан. Тұрғындардыңәл-ауқатына көңіл бөліп жатқан барша азаматтарға үлкен алғысымды білдіремін, – деді шағын аудан тұрғыны Назгүл Нұрланқызы.
