Фото: Ақорда
Қазақстан тәуелсіздік алғаннан бері көпвекторлы сыртқы саясат ұстанып келеді. Бұл бағыт елдің геосаяси жағдайына және ұлттық мүдделерін тиімді қорғау қажеттілігіне негізделген, деп хабарлайды Todayinfo.kz ақпарат агенттігі.
Тұран университетінің қауымдастырылған профессоры, саясатанушы Айтымбетов Нүркен Ысқақұлының пікірінше, Қазақстанның басты ерекшелігі — Қытай мен Ресей секілді алып державалардың ортасында орналасуы және теңізге шығатын жолының болмауы. Сондықтан ел басынан бері осы екі елмен тең дәрежелі, өзара тиімді байланыс орнатып келеді.
Ол атап өткендей, Қазақстанның халықаралық қатынастардағы табысы — бейтараптық пен көпжақты әріптестікті үйлестіре білуінде. Ел Еуропа, АҚШ, Ресей және Қытаймен қарым-қатынасты қатар дамыта отырып, экономикалық және мәдени байланыстарды нығайтып келеді.
Сарапшының айтуынша, бұл саясаттың басты мақсаты — шетелдік инвестиция тарту және ел экономикасын әртараптандыру. Қазақстан тәуелсіздік жылдарында табиғи ресурстарды игеру ісіне әлемнің алпауыт компанияларын тартып, экономикалық өсімге қол жеткізді.
Айтымбетов елдің халықаралық аренадағы беделін арттырған бейбіт бастамаларға да тоқталды. Қазақстан ядролық қарудан бас тарту арқылы әлемге үлгі болды, Сирия келіссөздері мен Әлемдік діни көшбасшылар съезін өткізу арқылы жаһандық бейбітшілікті қолдады.
Саясаттанушы елдің қазіргі сыртқы саясатының басты қағидаты — теңгерім мен тұрақтылықты сақтау екенін айтады.
«Қазақстан көршілермен және халықаралық ұйымдармен татулық пен ынтымақтастықты сақтай отырып, сыртқы саясаттағы тепе-теңдікті бұзбауы керек. Бір елге шамадан тыс жақындамай, барлық мемлекеттермен тең дәрежеде байланыс ұстау маңызды», — дейді ол.
Сондай-ақ, сарапшы экономикалық даму мен ұлттық қауіпсіздік арасындағы байланысты күшейтуді ұсынады.
«Әскердің қуаты — шекара тұтастығы мен егемендіктің кепілі. Әскери жүйені реформалап, жастарды өз еркімен баруға ынталандыру қажет. Бұл елдің беделін арттырады», — деп түйіндеді ол.
