Фото: Sn.kz
Белгілі адвокат Жангелді Сүлейманов Президент Қасым-Жомарт Тоқаевқа үндеу жолдап, жаңа Салық кодексін қолданысқа енгізуді кейінге қалдыруды сұрады, деп хабарлайды Todayinfo.kz ақпарат агенттігі.
Заңгердің айтуынша, қазіргі нұсқадағы құжат кәсіпкерлікке ауыр соққы болып, бизнес-климатты нашарлатады.
«Құжат шикі. Онда құқықтық тұрғыдан өрескел қателер мен әділетсіз нормалар жетерлік. Бұл жайында сарапшылар мен кәсіпкерлер де айтып жүр. Өзім бірнеше рет мемлекеттік органдарға хат жазып, қарама-қайшылықтарды жоюды талап еттім», — деді адвокат.
Оның сөзінше, басты қауіп енді көптеген салық мәселесінің кодекстің өзінде емес, одан төмен тұрған 245 нормативтік-құқықтық актімен реттелуінде.
«Кодекстің өзінде қаншама қате бар. Ал асығыс дайындалған 245 қосымша құжаттың сапасы қандай болмақ? Жақында қабылданған бір ғана актіден он қате таптым. Егер осылай жалғаса берсе, мыңдаған қателік жиналып, жағдайды одан сайын қиындатады», — деп алаңдады Сүлейманов.
Адвокаттың пікірінше, жаңа кодекс бизнеске ауыр салмақ артып, кәсіпкерлерге түсетін салық жүктемесін арттыруы мүмкін.
«Қазір кәсіпкерлер тек ҚҚС мөлшерлемесі мен жеңілдетілген режимді талқылап жүр. Ал шын мәнінде басты қауіп – заң нормаларының қалай қолданылатынында. Егер бап түсініксіз жазылса, салық органы оны әрдайым өз пайдасына шешеді», — дейді ол.
Жангелді Сүлейманов бұл мәселені азаматтық борышы ретінде көтеріп отырғанын айтты.
«Менің кәсібіме бұл тиімді болар еді — қателер көп болса, жұмысым көбейеді. Бірақ мен ең алдымен Қазақстан азаматы ретінде елімнің ертеңіне алаңдаймын», — деп түйіндеді адвокат.
