Қарағанды облысының Ақтоғай ауданында археологтар шамамен 2,5 мың жыл бұрынғы сақ дәуіріне жататын бірегей жәдігерлер тапты. Бұл туралы облыс әкімінің орынбасары Әлібек Әлденей әлеуметтік желідегі парақшасында хабарлады, деп жазады Todayinfo.kz ақпарат агенттігі.
Облыстық тарихи-өлкетану музейінің археологтары жүргізген қазба жұмыстары кезінде Қарабие қорымынан бес қола жебе ұшы мен арқардың мүйізімен өрнектелген, металдан тұтастай құйылған қанжар сабы табылған. Ғалымдардың пайымынша, бұл заттар ерте сақ кезеңіне тиесілі.
Қорымның қақ ортасынан табылған адам қаңқасының орналасу үлгісі бұған дейін қазақ даласынан табылған әйгілі сақ ханзадасы — «Алтын адаммен» ұқсастығын көрсеткен. Археологтардың айтуынша, бұл табылған бұйымдар ежелгі шеберлердің металл өңдеу технологиясын жақсы меңгергенін, сондай-ақ бабаларымыздың көркемдік талғамының жоғары болғанын дәлелдейді.
Әлібек Әлденейдің айтуынша, Қарағанды өңірі тек көмір мен темірдің емес, сонымен қатар баға жетпес рухани мұраның ордасы.
«Біздің аймақ ежелгі өркениет пен мәдениеттің алтын бесігі болған. Бұған дейін де Арқаның “Алтын тәжі” саналатын Қарқаралы маңынан алтын адам табылған еді. Сондай-ақ үш мың жылдық тарихы бар Шет ауданындағы Қаражартас пирамидасы мен академик Әлкей Марғұлан ашқан Беғазы қорымы — осы өңірдің көне мәдениет орталығы болғанын дәлелдейді», — деді ол.
Облыс әкімінің орынбасары мұндай тарихи олжаларды сақтау — келер ұрпақ алдындағы қасиетті міндет екенін атап өтті.
«Тарихи-мәдени мұраларымызды көздің қарашығындай сақтау — әрбіріміздің борышымыз. Өйткені ол ұлттың рухани капиталы мен мәдени бірегейлігін айқындайды», — деді Әлібек Әлденей.
