Фото: gazeta.uz
Қырғыз Республикасының президенті Садыр Жапаров ел тұрғындарына үндеу жасады, деп хабарлайды Todayinfo.kz ақпарат агенттігі.
Оның айтуынша, мемлекет ішіндегі жағдайды тұрақсыздандыруға бағытталған кез келген әрекет сәтсіз аяқталады. Жемқорлық схемалары әшкереленгеннен кейін табыс көздерінен айырылған жекелеген топтар блогерлер мен арандатушылар арқылы жалған ақпарат таратып, халық арасында наразылық тудыруға тырысып жатыр, деі ол.
«Бұл қандай топтар? Олардың арасында бұрын атышулы жемқорлық істері бойынша ұсталып, сот шешімімен мемлекетке үлкен сомада қаражат немесе нысандарды қайтарғандар бар. Көлеңкелі схемалары бұзылып, табысынан айырылғандар да бар. Қызметінен кетіп, жеке мүддесі үшін кек алуға тырысып жатқандар бар. Яғни, жеке басының пайдасы үшін ренжіген адамдар», – деді Садыр Жапаров.
Қырғызстан басшысы кейбір тұлғалар жеке мүддесі үшін блогерлерді пайдаланып жатқанын да жеткізді. Айтуынша, олар «KG Group», «Ихсан» секілді алаяқтар салған үйлер туралы мәселелерді қайта қозғап, оларды сапасыз етіп көрсеткісі келеді.
«Біз бұл үйлерді кезең кезеңмен бітіреміз, заңдастырамыз, жарық қосамыз. Басқа үйлердің мәселесін шешу үшін уақыт қажет. Барлығы аяқталады. Сол себепті тұрақсыздыққа үміт артпаңыздар. Төңкеріс болмайды. Біріншіден, біз төңкеріске әкелетіндей жағдайға жеткізбейміз. Екіншіден, бұрынғыдай әлсіз мемлекет жоқ, қазір мықты бола түсті. Үшіншіден, халық қазір кімді қолдау керек екенін әрі кімнің билікте болуы тиіс екенінен хабардар», – деп атап өтті Қырғыз Республикасының президенті.
