Жетісу ауданында қоғамдық кеңістікті абаттандыру мен қолайлы қалалық орта құру жұмыстары аяқталып қалды. Аудан әкімі Ләззат Жылқыбаеваның айтуынша, бұл жобалар тұрғындардың өмір сүру сапасын арттырып, қаланың көкке оранған заманға сай келбетін қалыптастыруға бағытталған, деп хабарлайды Todayinfo.
Сейфуллин мен Жансүгіров қиылысындағы көлік айрығы маңындағы қоғамдық кеңістікті абаттандыру негізгі жобаның бірі болды. Жалпы аумағы 3,4 гектар болатын бұл жерде 30,4 мың м² аумақты көгалдандырып, 5,8 мың м² жерге тас (брусчатка) төселді. Сонымен қатар, 7 ұңғыма бұрғыланып, 3,5 гектар аумаққа автоматты суару жүйесі орнатылған. Мұнда 192 ағаш, 14 мың бұта мен 2 400 гүл егіліп, екі альпілік төбешік жасалды.
«Гүлдер» паркінің жөндеу жұмысы да аяқталды. Мұнда 6 мың м² аумаққа біржылдық және көпжылдық гүлдер егіліп, 750 м² жер көгалдандырылды. 4 ұңғыма бұрғыланып, 4,5 мың м² аумаққа автоматты суару жүйесі орнатылды. Парк аумағында үш сәндік тоған мен гүлмен көмкерген аркалар пайда болды.
Бұдан бөлек, Құдабайұлы мен Аралтөбе көшелерінің бойындағы учаскелер мен Жұмабаев көшесіндегі көпір абаттандырылды.
12 жерде автоматты суару жүйесі орнатылып, 15 ұңғыма бұрғыланды, 76 мың м² аумаққа көгал егілді. Бұл жұмыстар қаланың маңызды бағыты – Рысқұлов–Сейфуллин, Рысқұлов–Сүйінбай, Серіков, Солтүстік айналма жол–Бөкейханов қиылысында атқарылды. Мақсаты — жасыл қорды сақтап, ауданды экологиялық тұрғыда барынша жайлы ете түсу.
Қажеттілігі бар адамдар үшін қолжетімді орта құруға да ерекше көңіл бөлінген. 18 жерүсті жаяу жүргінші өткеліндегі тік және көлденең көтергіштер жөнделіп, ауыстырылды.
Сонымен қатар, абаттандыру аясында Қарасу өзені үстіндегі көпірге күрделі жөндеу жүргізіліп, Первомайка ауылының (солтүстік-батыс бөлігі) зират аумағына 163 м² қоршау орнатылып, қақпа мен есік жасалды.
Келер жылы Жетісу ауданында абаттандыру жобалары жалғасын табады: автоматты суару жүйелерін кеңейту, жаңа демалыс аймақтарын құру мен тұрғылықты жайлардағы тротуарларды қайта жаңарту жоспарланған.
«Абаттандыру – бұл жай жөндеу емес. Бұл – тұрғындарға жайлы өмір сүруге, демалуға және балаларымен серуендеуге мүмкіндік беретін қалалық орта құру. Біз табиғатқа қамқорлықты үйлестірген заманға сай аудан қалыптастырып жатырмыз», — деп түйіндеді өз сөзін Ләззат Жылқыбаева.
